Qırımtatar Maaliy Merkezi

‘İşğal etilgen Qırımda insan haqlarınıñ bozuvları her kün yüz bermekte’-AQŞ

29.04.2021

Cumaaqşamı künü, aprelniñ 29-unda Venada OBSE daimiy Keñeşiniñ toplaşuvında AQŞ temsilciligi işğal etilgen Qırımda insan haqlarınıñ bozuvları her kün yüz bergenini bildirip, RF-nı siyasiy mabuslarnı azat etmege çağırdı.

‘Yazıq ki, işğal etilgen Qırımda insan haqlarınıñ bozuvları her kün yüz bermekte. Qırımtatarlar, etnik ukrainler ve digerler işğalcı hakimiyet tarafından taqip oluna, yaqalana, hapiske alına ve atta işkencege oğratıla,’-denile haberde.

 AQŞ yaqında ‘Qırım’ gazetasınıñ muarriri Bekir Mamutovğa nisbeten mahkeme qararı haqqında hatırlattı ve ‘qanunsız missioner faaliyetinde’ qabaatlanğan imam Yusuf Aşirovnıñ meselesini ayrıca qayd etti.

 ‘AQŞ Moskvanı bütün siyasiy mabuslarını azat etmege, Qırım işğaline soñ qoyıp, öz arbiy küçleri, tehnikanı Ukrainanıñ şarqından çıqarmağa çağıra’,- qoştı AQŞ temsilciligi.