Qırımtatar Maaliy Merkezi

Kluni fondu RF-dan ekinci bağçasaray ‘Hizb ut-Tahrir davası’nıñ iştirakçilerini azat etmege talap ete

29.04.2021

Gollivud aktörı Corc Kluni ve ömürarqadaşınıñ Fondu RF-dan ekinci bağçasaray ‘Hizb ut-Tahrir davası’nıñ iştirakçilerini azat etmege ve işğal etilgen territoriyalarda Ukrain vatandaşlarını taqip etmekni toqtatmağa talap etti.

‘Eñ başından Mustafayev ve vatandaşlarına qarşı qabaatlavlar halqara gumanitar haqlarını, cenq qaidelerine ters kelgen bozuvlardır. Ayrıca işğal etilgen territoriyada Rusiye öz  ceza haqlarını işletmesi cenk zamanında yerli sakinlerni qoruv haqqında Konventsıyanıñ 64 maddesini bozmaqta’,-denile haberde.

 Fondda qayd etilgeni kibi, Mustafayev, Asanov, Ametov, Belãlov, Zekiryayev, İbragimov, Saliyev ve Smailovğa nisbeten ceza davaları boyunca mahkeme işleri yaqalanğanlarnıñ adaletli mahkeme haqqını ve halqara gumanitar haqlarınıñ talaplarını boza.

 Hatırlatamız ki, 2017 senesi oktãbrniñ 11-inde Bağasarayda işğalcılar 6 qırımtatar evinde tintüvler keçirip, Marlen Asanov, Seyran Saliyev, Timur İbragimov, Memet Belãlov, Ernes Ametov, Server Zekiryayevni yaqaladılar. Olar RF-nda yasaq etilgen ‘Hizb ut-Tahrir’ teşkilãtında iştiraginde qabaatlandılar.

 2018 senesi 21 mayıs künü Qırımda rusiye silãhlı küçler ‘Qırım birdemligi’ cemaat teşkilãtınıñ faallileri Server Mustafayev ve Edem Smailovnıñ evlerinde tintüv keçirdiler.

2019 senesi fevral ayında  ekinci bağçasaray ‘Hizb ut-Tahrir’ davasınıñ 8 iştirakçisi-Marlen Asanov, Seyran Saliyev, Timur İbragimov, Memet Belãlov, Ernes Ametov, Server Zekiryayev, Server Mustafayev ve Edem Smailovğa nisbeten Rf ceza yasasınıñ 278 maddesi boyunca ceza davası açıldı (hakimiyetni zorbalıqnen elge keçirüv).

16 sentãbr künü Rostov-na-Donu arbiy mahkemesi ekinci bağçasaray ‘Hizb ut-Tahrir’ davasınıñ iştirakçilerine dair mahkeme hükmüni çıqardı. Marlen Asanov 19 yıl mütemleke, Memet Bilãlov-18, Timur İbragimov-17, Seyran Saliyev-16, Server Mustafayev-14, Server Zekiryayev ve Edem Smailov-13 sene müstemleke cezasına mahküm etildiler. Ernes Ametov qabaatsız tanılıp, azat etildi.