Qırımtatar Maaliy Merkezi

‘Qırımdaki rusiye hakimiyeti sürgünlikniñ aqlanmasına gizliden qoltuta’- Bariyev

09.04.2021

Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev Qırımda ocalardan biri qırımtatarlarnı satqın dep adlandırğanını ‘Qırım.Aqiqat’ ile subetinde izaat etti. Ekspertniñ fikrine köre, rusiye hakimiyeti gizlden olsa da, sürgünlikni doğru sayğanından dolayı 21 asır balaları eziyet çekmege başlaylar.

‘Bu ketişatta belli bir tertip peyda olğanını köremiz. Her halda, Qırım işğalinden soñra peyda olğan muhitte böyle cahil, provokator ocalarnıñ çalışmasına yol berile. Qırımda çoq vaqıt devamında ‘qırımtatarlar-satqınlar’, ‘sürgünlikni qazandılar’ kibi malümat darqala edi. Bu vaziyetnen küreşmege mecbur oldıq ve mustaqil Ukraina devrinde mezkür vaziyetni deñiştire bildik. Bugünde bugün negativ fikirler çoqlaştı. Bir vaqıtları, biz-sovet balaları keçirgen problemler şimdi 21 asır balaları ögünde turacağına oşay,’- dedi o.

Bariyev Qırımda, Bağçasaray rayonı, Verhoreçeskoye köyünde olıp keçken vaqia, ayrıca da, ana tili olaraq rus tili yazıp berilgen arizalar darqatılmasını hatırlattı.

‘Böyle kibi vaqialar Aqmescitte, Kefe, Bağçasaray rayonında yüz bergen edi. Diger oquv yurtlarında ana-babalarnı qırımtatar tilinde tasil almamağa qandıra ediler, buña imkãnlar, yani ne sınıf, ne oca olmağanını aytıp. Digerlerinde doğrudan doğru arizanı qabul etmey ediler. Cemaatçılıq nazirlikke başvursa da, mektep müdiri ve atta poliske muracaat etse de, beklegen cevabını alamadı,’- dedi o.

Ekspertniñ aytqanına köre, qırımtatar tili bir fen olaraq ögrenile ve böyle etip, mekteplerde ana tilini ögrenmek içün manialar qurula. Yarımadada ukrain tilini talebelerniñ 0,01 % , qırımtatar tilini ise- 3%-ğa yaqın ögrene. Ukrain ve qırımtatar tilleri ise, Qırım anayasasına binaen, rus tilinen bir sırada devlet tilleri sayıla.