Qırımtatar Maaliy Merkezi

Ekinci aqmescit ‘Hizb ut-tahrir’ davasında qabaatlanğanlar devlet avdokatlarını red ettiler

07.04.2021

Salı künü, 6 aprel künü Cenübiy arbiy mahkeme toplaşuvı devamında ekinci aqmescit ‘Hizb ut-tahrir’ davasında qabaatlanğanlar Vladlen Abdulkadırov, Mecit Abdurahmanov, Tofik Abdulgaziyev, İzzet Abdullayev ve Bilal Adilov devlet advokatlarınıñ hızmetini red ettiler. Olarnıñ menfaatlarını özleri añlaşqan advokatlar qorcalacaqlar. Bu aqta ‘Qırım birdemligi’ haber ete.

Hatırlatamız ki, eki yıl evel, 2019 senesi martnıñ 27-sinde, rusiye silãhlı küçler  işğal etilgen Qırımda qırımtatarlarnıñ 26 evinde tintüvler keçirdiler. Bazı cemaatçılarnıñ evinden silãhlı küçler özleri gizliden qaldırğan edebiyat tapıp çıqardılar. Kitaplardan ğayrı adamlarnıñ telefonları, bilgisayar, pasportları alına edi. Silãhlılar özlerini qaba alıp bara, yaqalanğanlarğa qarşı fizik küçüni işlete, evlerge ayaqqapnen kire, advokatlarnı yibermey ediler.Neticede 20 adam yaqalandı, olarnı Rusiyede yasaq etilgen ‘Hizb ut- Tahrir’ teşkilãtında iştirak etkenlerinde qabaatlaylar. Martnıñ 28-inde daha 3 qırımtatarı yaqalandı.  27-28 mart künleri işğalcı mahkeme 23 yaqalanğan cemaatçını hapiske aldı ve ileride hepisiniñ hapis müddeti uzatıldı.