Qırımtatar Maaliy Merkezi

‘Olar satqınlar ediler’- ocapçe işğal etilgen Qırımda qırımtatarlarnı ne içün sürgün etkenleriniñ ‘sebeplerini’ açıqladı

06.04.2021

İşğal etilgen Qırımda, Sudaq rayonı Taraqtaş köy mektebinde, başlanğıç sınıf ocası Yelena Rudenko milletlerara tartışmasını qozğata. Qadın talebelerge bütün qırımtatarlarnı olar ‘hepisi satqın olğanları içün’ sürgün etkenlerini ayttı. Bu aqta talebelerden biriniñ anası Safinaz Aliyeva bildire.

‘Qızım Samira Aliyeva Sudaq rayonı Taraqtaş köy mektebiniñ 4 sınıfında oquy.  Sınıf rehberi ve edebiyat ocası Rudenko Yelena Alekseyevna  II Cıhan cenkinde iştirak etken qartbaba-bitaları haqqında hikãye etmek vazifeni bergen edi,’-denile haberde.

 Qızçıq cebede uruşqan, amma yaralanğan soñ qaytıp kelgen qartdedesi haqqında hikãye etken. Soñra dedesini ömürarqadaşınen birlikte Qırımdan sürgün etken ediler. Bu yerde oca Samiranıñ sözüni bölip, qırımtatar halqını ne içün sürgün etkenini añlatacağını bildirdi.

‘Men şimdi sizge qırımtatarlarnı ne içün sürgün etkenlerini añlatırım. Olar nemselerge Qıırımnı işğal etmege yardım ete ediler, demek olarnı satqın olğanları içün sürgün ettiler,’- dedi Rudenko.

Qıznıñ anası qayd etkenine köre, qızçıq birden derste sınıfdaşlarınıñ öpkeli baqışlarını his etti. Sınıftaki qalğan 9 qırımtatar talebesi de aynı duyğularını yaşadılar.