Qırımtatar Maaliy Merkezi

Ukrainada ‘Siyasiy mabuslarnı azat etüv platformasını’ meydanğa ketirdiler

04.03.2021

Cumaaqşamı künü, martnıñ 4-ünde, 16 sabıq mabus tarafından ‘Siyasiy mabuslarnı azat etüv platforamsı’ meydanğa ketirildi. Platformanıñ esas maqsadı ‘eñ yaqın zamanda adaletniñ yeñmesidir’. Bu aqta Oleg Sentsov öz Facebook sahifesinde bildirdi.

‘Platforma-devletimizden tış, işğal territoriyalarda ve devletniñ içinde  siyasiy mabuslarnı azat etmek, olarnıñ haqları qorçalamaq niyetinen meydanğa ketirilgen firqasız birleşmedir. Maqsadımız- her birimizge nisbeten adaletniñ eñ yaqın zamanda yeñmesidir’,- denile muracaatta.

 Platformanıñ tesisçileri: Aseyev Stanislav, Baluh Vladimir, Bekirov Edem, Grib Pavel, Jemçugov Vladimir, Karpük Nikolay, Kolçenko Aleksandr, Kozlovsky İgor, Movenko İgor, Panov Yevgeniy, Ramazanov İsmail, Semena Nikolay, Sentsov Oleg, Suşçenko Roman, Çiygöz Ahtem, Şumkov Aleksandr.

 ‘ Platforma Rusiye Federatsıyasınıñ agressiyası neticesinde  hapishanede bulunğan mabuslar, esirlerni azat etilmesinen meşğuldir. Ondan da ğayrı, ukrain tarafdarları olğan cemaatçılarnııñ siyasiy cehetten qanunsız taqip etilmelerini de takbih etemiz,’- dep qoştı Sentsov.