Qırımtatar Maaliy Merkezi

‘Til işletilse canlı qalır’- Bariyev

22.02.2021

Qırımtatar resurs merkeziniñ reisi, qırımtatar Meclisiniñ çetel işler ve huquq meseleleri boyunca idaresiniñ başı Eskender Bariyev ‘UA:Крим’ telekanalınıñ yayınında qırımtatar tiliniñ vaziyetini izaat eterek, til işletilse ve onı ögrenmege ihtiyac duyulğanda canlı qalacağını qayd etti.

‘ Til işletilse canlı qalır. Tilniñ işletilmesi içün ise qırımtatar tili qullanılması kerek olğan iş yerleri temin etilmesi kerek. Bu yerde biz mektepler, milliy matbuat hızmetleri haqqında bahs etemiz’,- dedi o.

 Bariyevniñ fikrine köre, Qırımda işğalden evel qırımtatar milliy haber vastaları faal şekilde inkişaf etken zamanda, bir sıra tedbirler, festivaller keçirilgende gençlerniñ qırımtatar tilini ögrenmek ihtiyacı peyda olğan edi. Ekspert 2032 senesine qadar qırımtatar tiliniñ inkişafı ve kütleviyleştirilmesi Kontseptsiya leyhasını izaat etti.

‘Devlet tiliniñ qorçaluvı boyunca vekãletliniñ muavinlerinden biri tamır halqlarnıñ saqlanılması ve inkişafı içün mesüliyetli olsa pek yahşı olur edi,’- dedi Bariyev.

 Bundan da ğayrı, Eskender Bariyevniñ aytqanına köre, qırımtatar tiliniñ ihtisasiy cihetten inkişaf etilmesi pek mühim. O bildirgenine binaen, ayrıca Qırımtatar resurs merkezi tarafından insan haqlarınıñ umumiy deklaratsıyasını qırımtatar tiline tercime etmek teşebbüsi kösterildi.