Qırımtatar Maaliy Merkezi

Rusiye müstemlekesi (koloniyası) siyasiy mabüsı Teymur Abdullayev aqqında iç bir malümat bermey.

19.01.2021

Aqmescitteki "Hizb ut-Tahrir" işi boyunca yaqalanğan Teymur Abdullayevniñ abulkatı (qorçalayıcısı) siyasiy mabüsniñ aqqında malümat berilmegeni sebebinden rusiye müstemlekesine (koloniyasına) memuriy isklerni taqdim etmege niyetlene.

Qayd etile ki, abulkat  Siyar Paniç onıñ qoruvı astında bulunğan Teymur Abdullayevniñ iç bir esassız ŞİZOğa  keçirilip qoyulması sebebinden 2020 senesiniñ dekabr ayında Başqırtstan müstemlekesine sorav yollağan edi. Bundan ğayrı böyle sorav müstemlekeniñ tibbiy-sanitar bölügine de yollanılğan edi. Cevaplar yoq. Şunıñ içün abulkat müstemleke tarafından kerekli malümatlar berilmegeni sebebinden, oña  memuriy isklerni bermege meram etmekte.

Malüm olğanı kibi, 2016 senesi 12-oktâbrde Aqmescit civarındaki Mamaq (Strogonovka) köyünde  kütleviy tintüvler neticesinde rusiye silâcıları tarafından tamır qırımtatar halqınıñ beş vekili yaqalanğan edi – Üzeir Abdullayev, Teymuraz Abdullayev, Rustem İsmailov, Emil Cemadenov ve Ayder Saledinov. Olar Rusiye Federatsiyasında yasaq olğan "Hizb ut-Tahrir" teşkilâtınıñ iştirakçileri kibi , yani RF –nıñ Cinayet Kodeksiniñ 205.5  maddesi boyunca ( "terroristik teşkilâtnıñ faaliyetini teşkil etüv ve onda iştirak etüv" ("organizatsiya deyatelnosti terroristiçesköy organizatsii i uçastiye v ney")) qabaatlandılar.

2019 senesi 18-iyünde RF-niñ Şimal-Kavkaz dairesiniñ arbiy mahkemesi Aqmescit "Hizb ut-Tahrir işleri" boyunca yaqalanğanlarğa ükümlar çıqardı. Teymur Abdullayev 1 yıl ve 6 ay azatlıqtan sıñırlatmaq ile 17  yıl qattı rejimli  müstemlekege  (koloniyağa) cezalandı, Rustem İsmailov – 14 yıl, Üzeir Abdullayev -13 yıl, Ayder Saledinov ve Emil Cemadenov – 12 yılğa cezalandılar. 

2019 senesi 24-dekabrde Moskvadaki Yuqarı mahkeme tarafından Aqmescit "Hizb ut-Tahrir işleri" boyunca yaqalanğanlarnıñ sıñırlanuv müddetleri 6-ğa qadar qısqartılğan edi.