Qırımtatar Maaliy Merkezi

"Qırım al-azırda ekotsidke oğratıla'' - Bariyev

30.12.2020

Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev ''Apostrof'' telekanalına begen intervyusında işğalciler tabiy suv menbalarını aqılsızca işletkenleri sebebinden Qırımda ekotsid yüz bergenini qayd etti.

''Suvnen bağlı vaziyet kün-künden beterleşe. Misal olaraq, Bahçisaray rayonınıñ bazı köylerindeki quyularda suv yoq oldı. Yalta şeerinde ve Büyük Lambatta suv künde eki kere olıp, siyrekçe, yani saba ve aqşam berilmege başladı. Aqyar şeerinde de suvnen temin etüv problemli oldı'', - dep ayttı o.

Bariyevniñ qayd etkenine köre, işğalciler bir şeyler yapmağa tırışa: olar suvnı tuzdan temizlemege ve Qırım üzerindeki bulutlarnı toplamağa tırıştı, amma böyle leyhalarnıñ episi müsbet netice bermedi.

''Yani, olar bir taraftan Qırım sakinlerine, bizim vatandaşlarımızğa, bir şeyler yapmağa tırışqanlarını köstereler. Diger taraftan, tabiy suv menbaları aqılsızca işletilgeni sebebinden Qırımda ekotsid yüz bergenini köremiz'', - dep izaatladı ekspert.

Meclis azası, em Ukraina devleti, em resmiy akimiyet, em de cemaat teşkilâtları 2021 senesi keçirilecek forumğa azırlıq körmek kerek olğanlarını qayd etti. İşbu tedbir esnasında Qırımdaki ekosistema saasında vaziyet ve işğalcilerniñ Qırımğa tesir etüvlerine dair tolu ve açıq-aydın malümat berilmeli.

''Suv mevzusına kelgende ise, biz öz nevbette saban ayında etraf müit ve insan aqları saasında esabatını azırlaycaq mahsus maruzacığa esabatımıznı yolladıq. İşğalciler tarafından suv aqılsızca işletilgeni aqqındaki malümat açıqlanacağına ümüt etemiz. Onıñ maruzası hususan içilecek suv meselelerine bağışlanacaqtır'', - dep qoştı o.