Qırımtatar Maaliy Merkezi

''Eki yıldan berli körüşip olamaymız'' - siyasiy mabus Abdulğaziyevniñ ömür arqadaşı

16.12.2020

Aqmescitteki ekinci ''Hizb ut-Tahrir davasınıñ'' iştirakçisi Tofik Abdulgaziyevniñ ömür arqadaşı Aliye Qırımtatar Maaliy Merkezine eki yıl devamında aqayınen körüşip olamağanını ve o, tez vaqıtta Rostov-na-Donu şeerine avuştırılacağını haber etti.

Qadın, eki yıl devamında aqayınen körüşip olamağanını ayttı. Ve o, tez vaqıtta Rusiye Federatsiyasına avuştırılacaq, çünki ''davası'' boyuca malümatlar endi Rostov-na-Donu şeerindeki Cenübiy okrugınıñ arbiy mahkemesinde buluna.

Sağlıq vaziyetine kelgende ise, Aliye, aqayıniñ eşitüv qabiliyeti fenalaşqanını qayd etti.

''Tofikniñ eşitüv problemi bar. Bir qulağı eşitmey, desek olacaq, ekincisi ise pek yaramay eşite. Bundan evel büyük ihtimal ile o, otit keçirdi ve bundan soñ onıñ eşitüv qabiliyeti fenalaştı. Oña tıbbiy yardım berilmedi. Biz yollağan ilaclarnen tedaviylendi. Bundan ğayrı o, tumavğa oğrağan'', - dep ikâye etti qadın.

Hatırlatamız ki, 2017 senesi saban ayınıñ 27-de Rusye işğalcileri 26 qırımtatar evinde kütleviy tintüvler keçirdiler. Bazı faalerde yasaq etilgen kitaplarnı taptılar. "Qırım birdemiligi" birleşmesiniñ malümatına köre, şu kitaplarnı quvetçiler özleri ketirip qoydılar. Kitaplardan ğayrı insanlardan telefon, planşet, noutbuk ve pasportlarını tutıp aldılar.  Quvetçiler qırımtatarlarğa nisbeten qaba şekilde areket ete ediler. Olar yaqalanğan insanlarğa qarşı küç qullandılar. Evlerge ayaqqaplarını çıqarmayıp kirdiler. Tintüvlerge kelgen advokatlarnı müşterilerine yibermey ediler. Tintüvler neticesinde 20 insan yaqalandı, olarnı Rusiyede yasaq etilgen "Hizb ut-Tahrir" teşkilâtına alâqası olğanında qabaatladılar. Saban ayınıñ 28-de tintüvler keçirilgen vaqıt evlerinde olmağan daa üç qırımtatar faalini yaqaladılar. Saban ayınıñ 27-de ve 28-de işğal "mahkemesi" tintüvlerden soñ yaqalanğan 23 insannıñ cemisini apiske aldı. Sıñırlav tedbiri olaraq, episini tevqifhanede qaldırdılar. Soñra apis müddeti defalarca uzatılğan edi.