Qırımtatar Maaliy Merkezi

İşğalciler Qırımda nevbetteki arbiy talimatlarını keçirdiler

16.12.2020

Salı künü, ilk qış ayınıñ 15-de, tacmaraz hastalığınıñ darqalmasına baqmadan, işğal etilgen Qırımda nevbetteki qanunsız arbiy talimatlar keçirildi, vertolöt pilotları sıñırlı körüv şaraitlerinde uçuşlar kerçekleştirdiler. Bu aqta Qaradeñiz flotunıñ matbuat hızmeti haber ete.

''Vertolöt pilotları basıq bulutlılıq ve yan taraftan üfürgen yel sebebinden sıñırlanğan körüv şaraitlerinde uçuşlar kerçekleştirdiler. Uçuşlar kündüz ve gece vaqıtında kerçekleştirildi'', - dep haber etile bildirüvde.

Hatırlatamız ki, işğal etilgen Qırımda muntazam sürette arbiy talimatlar keçirile, gençler Rusiye Federatsiyasınıñ ordusına hızmetke çağırıla. Rusiye arbiyleri tarafından keçirilgen talimatlar yarımadanıñ etraf müitine büyük zarar ketirip, halqara uquqnı qaba şekilde boza.

Bundan evel NATO Qırımğa dair beyanatında Rusiyeni Qırımda ve Qara deñiz regionında arbiy küçüni arttırğanı içün takbih etti.