Qırımtatar Maaliy Merkezi

Siyasiy mabus Ayder Cepparovnıñ sağlıq vaziyeti fenalaştı - ömür arqadaşı

15.12.2020

''Hizb ut-Tahrir davasınıñ'' iştirakçisi Ayder Cepparovnıñ sağlıq vaziyeti fenalaştı: parmağında "irinli stafilokokk yangısı'' peyda oldı. Bu aqta Qırımtatar Maaliy Merkezine Ayderniñ ömür arqadaşı Margarita Cepparova haber etti.

Siyasiy mabusnıñ ömür arqadaşı aytqanına köre, o, alı yaramay olğanı sebebinden ''mahkeme oturışuvına'' barıp olamadı. Parmağında "irinli stafilokokk yangısı'' peyda olğan.

''Aqayımnıñ qolunda eki buçuq aftadan berli teren çıban bar. Taqiqat izolâtorı şaraitlerinde tedaviylendi. Şişigi eksildi, amma irin aqmağa devam ete, qolu kene ağırmağa başladı. Onıñ içün aqayım bügün özüni yaramay is etkeni sebebinden ücresinden çıqmadı ve mahkemege barmadı'', - dep ayttı Margarita Cepparova.

Qadın, aqayınıñ abulqatı ameliyat talabı ile şikâyet yazacağını qayd etti.

Hatırlatamız ki, 2019 senesi ilk yaz ayınıñ 10-da Rusiye quvetçileri Aluşta, Qarasuv ve Aqmescit şeerilerinde yaşağan qırımtatarlarnıñ evlerinde kütleviy tintüvler keçirdiler. Neticede Rusiyede yasaq etilgen "Hizb ut-Tahrir'' teşkilâtında iştirak etkenlerinde qabaatlanğan 8 kişi yaqalandı. İlk yaz ayınıñ 10-da ve 11-de Aqmescitteki Kiyev rayon "mahkemesi" Riza Omerov, Enver Omerov, Ayder Cepparov, Eskender Suleymanov, Ruslan Nagayev, Eldar Kantimirov, Ruslan Mensutov ve Lenur Halilovnı arman ayınıñ 5-ce apiske aldı.