Qırımtatar Maaliy Merkezi

Aqmescitteki ekinci ''Hizb ut-Tahrir davası'' iştirakçisiniñ apis müddeti uzatıldı

15.12.2020

İşğal etilgen Qırımnıñ Yuqarı ''mahkemesi'' Aqmescitteki ekinci ''Hizb ut-Tahrir davası'' iştirakçisiniñ apis müddetini uzattı. Enver Ametov taqiqat izolâtorında 2021 senesi qara qış ayınıñ 14-nece qalacaqtır.

Hatırlatamız ki, 2017 senesi saban ayınıñ 27-de Rusiye işğalcileri 26 qırımtatar evinde kütleviy tintüvler keçirdiler. Bazı faalerde yasaq etilgen kitaplarnı taptılar. "Qırım birdemiligi" birleşmesiniñ malümatına köre, şu kitaplarnı quvetçiler özleri ketirip qoydılar. Kitaplardan ğayrı insanlardan telefon, planşet, noutbuk ve pasportlarını tutıp aldılar.  Quvetçiler qırımtatarlarğa nisbeten qaba şekilde areket ete ediler. Olar yaqalanğan insanlarğa qarşı küç qullandılar. Evlerge ayaqqaplarını çıqarmayıp kirdiler. Tintüvlerge kelgen advokatlarnı müşterilerine yibermey ediler. Tintüvler neticesinde 20 insan yaqalandı, olarnı Rusiyede yasaq etilgen "Hizb ut-Tahrir" teşkilâtına alâqası olğanında qabaatladılar. Saban ayınıñ 28-de tintüvler keçirilgen vaqıt evlerinde olmağan daa üç qırımtatar faalini yaqaladılar. Saban ayınıñ 27-de ve 28-de işğal "mahkemesi" tintüvlerden soñ yaqalanğan 23 insannıñ cemisini apiske aldı. Sıñırlav tedbiri olaraq, episini tevqifhanede qaldırdılar. Soñra apis müddeti defalarca uzatılğan edi.