Qırımtatar Maaliy Merkezi

#LIBERATECRIMEA faalleri Ukraina halq deputatlarını Kreml mabuslarına atalıq yapmağa çağıralar

11.12.2020

Cuma künü, ilk qış ayınıñ 11-de, Qırımnı işğalden azat etüv ve qırımtatar halqı ile birdemlik oğrunda teşkil etilgen #LIBERATECRIMEA halqara areketi ''Deputat, Kreml mabuslarına yardım et'' leyhasını onlayn şekilde taqdim etip, Ukraina deputatlarını Rusiye işğalcileri tarafından apis etilgen ya da taqip etilgen Qırım sakinlerine atalıq yapmağa çağırdılar. Tedbirge sabıq siyasiy mabuslar, Ukraina halq deputatları, Qırımtatar Milliy Meclisiniñ azaları, aq qorçalayıcılar, faaller ve jurmalistler qoşuldılar.

Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev, Qırımtatar Maaliy Merkeziniñ malümatına köre, al-azırda Qırımda ve Rusiyedeki tahqiqat izolâtorında ve apishanelerinde 114 kişi tutulğanını haber etti. Onıñ aytqanına köre, #LIBERATECRIMEA faalleri Ukraina halq deputatlarına yazğan mektüplerinde siyasiy mabuslarğa atalıq yağmağa çağıralar. Bunıñ yapılması içün Ukraina halq deputatları:

1. Halq ögünde (matbuat konferentsiyalarda, Facebook, Twitter kibi içtimaiy ağlarındaki saifelerinde) 2020 senesi ilk qış ayınıñ 20-nece bir-de-bir Kreml mabusına atalıq yapacağı aqqında haber etmeli;

2. Ayda eñ az bir kere işbu siyasiy mabus aqqında halq ögünde beyanatlar yazmalı;

3. Ukraina Prezidenti Ofisinden, Ukraina çetel işler Nazirliginden ve diger vekâletli devlet organlarından Kremlniñ qırımlı siyasiy mabuslarını azat etüv meselesini faaleştirmege talap etmeli;

4. İşbu mabuslarğa ve olarnıñ qoranta azalarına uquqiy, siyasiy, informatsion, maddiy ve başqa türlü yardım köstermeli;

5. Başqa devletlerniñ parlamentlerindeki meslekdeşlerini atalıq yapmağa çağırmalı;

6. Üçtaraflama kontakt gruppasına imayeleri altında bulunğan mabuslarnıñ deñiştirüv cedveline kirsetilmesini talap etmeli;

7. Kreml siyasiy mabuslarınıñ aq-uquqlarını qorçalağan qanun leyhalarını azırlamalı;

8. Kreml siyasiy mabusları aq-uquqlarınıñ qorçalanmasını maqsat etip qoyğan halq ögünde başqa tedbirler keçirmeli;

9. Siyasiy atalıq maddiy yardımda bulunmaqnı talap etmey.

Eskender Bariyev haber etkenine köre, ilk qış ayınıñ 21-de #LIBERATECRIMEA matbuat konferentsiyasını keçirip, ''Deputat, Kreml mabuslarına yardım et'' leyhasına qoşulğan halq deputatları aqqında cemaatqa haber etecek.

Tedbirde sabıq siyasiy mabuslar Oleg Sentsov ve Edem Bekirov iştirak ettiler.

''Vazifesimiz - siyasiy mabuslarnıñ adlarını belli etmek, çünki böyle al olarnı koloniyada qorçalay ve azat etilmelerine yardım ete bile. Epimiz bu insanlar aqqında aytmalımız, Kuku, ağa-qardaş Abdullayevlar, Dudka ya da Vıgovskiyniñ soyadı er keske belli olmalı. Halq deputatlarımıznıñ işbu adamlarğa atalıq yapmaları pek yahşı iştir, çünki bu aqta çeşit türlü seviyelerde aytmağa imkânları bar'', - dep ayttı Oleg Sentsov.

''İşbu leyha er bir Kreml mabusı içün kerekli, yalıñız Ukraina Yuqarı Şurasınıñ deputatlarını degil de, vilâyet şuralarınıñ deputatlarını da işbu teşebbüske qol tutmağa çağıram. İşbu leyhanıñ keniş darqalması içün qolumızdan kelgenini yapmalımız'', - dep qayd etti Edem Bekirov.

#LIBERATECRIMEA halqara areketiniñ yöneticilerinden biri olğan Oliver Loode leyhanıñ esas maqsadlarından biri Kreml mabuslarınıñ azat etilmesi olğanını, işbu leyha İnsan aqları umumiy beyannamesiniñ esas maddelerine qol tutqanını qayd etti.

''Fikirimce, Ukraina halq deputatları işbu ceryanda esas roy oynay bile, çünki olar Ukrainanıñ siyasiy ve içtimaiy kün tertibine tesir ete bileler. Olarnıñ nümüne olmaları ve maneviy ceetten liderlikleri bütün dünyadaki deputatlarını ilhamlandırıp, misal olaraq, Avropa Parlamenti, Bundestag, ABD Kongressi ve başqa devletlerdeki deputatlarnıñ işbu leyhağa qoşulmalarına hızmet ete bile'', - dep qayd etti Oliver Loode.

Siyasiy mabus Seyran Saliyevniñ ömür arqadaşı Mumine Saliyeva qırımtatarlar soñki altı yıl devamında milliy, diniy ve siyasiy mensübiyetleri sebebinden sözde Qırım akimiyeti tarafıdan yapılğan başqı altında yaşağanlarını qayd etip, Qırım siyasiy mabuslarınıñ 200 balalarınıñ yaşayışlarınen bağlı çeşit türlü adiseler aqqında ikâye etti.

''Qırımlı siyasiy mabuslar - muayyen adlardan ibaret olğan bir cedveldir, deputatlar ve umumen alğanda siyasiy liderler işbu cedvelge kirgen bir-de-bir siyasiy mabusnıñ sesine çevirilse, oña uquqiy, informatsion ya da siyasiy qol tutuv berse, işbu cedvel canlanır, işbu soyadlar Rusiye apishanelerinde ve koloniyada yatıp kömülgen belgisiz adam olmaqtan çıqacaqlar. Böyleliknen olar işkencelerden ve basqıdan qorçalanır, unutılmağanından emin olurlar'', - dep qayd etti Mumine Saliyeva.

''Bereginâ'' cemaat teşkilâtınıñ yolbaşçısı Alla Makuh Ukraina Şarqındaki esirlerniñ taqdirleri ile paylaşıp, cemiyetni siyasiy mabuslar ve esirler aqqında maksimal şekilde haberdar etmege çağırdı.

Ukraina Halq deputatı Rustem Umerov keçenlerde teşkil etilgen ''Qırım platforması'' fırqalar arası deputatlar birligi siyasiy mabuslarnı azat etüv oğrundaki halqara ğayretlerni birleştirüvnen oğraşacağını qayd etti. Deputat, ''Platformanıñ'' faaliyeti çerçivesinde işbu teşebbüske qoltutmaq maqsadınen bütün siyasiy mabuslarğa atalıq yapacağını bildirdi.

Qırımtatar Milliy Meclisiniñ reisi Refat Çubarov ''Deputat, Kreml mabuslarına yardım et'' leyhasınıñ emiyetini qayd etip, işbu leyhanıñ tek kenişlenmeknen qaatlenmeyip, yañı rağbetlendirüv ve işmarlar alacağına eminligini bildirdi.

''Qırımtatar Milliy Meclisiniñ reisi olaraq bu teşebbüsniñ tek Ukraina cemiyetinde farq etilmeknen sıñırlanmayıp, maksimal derecede semereli olması içün bütün imkânlarımıznı celp etmege azırım'', - dep qayd etti Refat Çubarov.