Qırımtatar Maaliy Merkezi

Ukraina halqara aq qorçalav vastalarınıñ Qırımğa maniasız irişe bilmesini talap ete

27.11.2020

Cumaaqşamı künü, boş aynıñ 21-da Viyanada Ukrainanıñ halqara teşkilâtlarda daimiy temsilcisi Yevgen Tsımbalük AHİT Daimiy şurasınıñ oturuşuvı esnasında Rusiye Federatsiyasından halqara aq qorçalav vastalarınıñ, şu cümleden, AHİT Mahsus nezaret etici missiyasınıñ Qırımğa maniasız irişe bilmesini talap etti.

''BM Baş Assambleyası keçken afta, boş aynıñ 18-de, ''Ukrainanıñ vaqtınca işğal etilgen Qırım Muhtar Cumhuriyeti ve Aqyar şeerinde insan aqları saasında vaziyet'' mevzusında qabul etken qarar leyhasına aza devletlerniñ diqqatını celp etmege isteyim. Başqa meselelernen bir sırada, qararname leyhası Rusiye Federatsiyasından halqara aq qorçalav vastalarınıñ, şu cümleden, AHİT Mahsus nezaret etici missiyasınıñ Qırımğa maniasız irişe bilmesini talap etmekte'', - dep ayttı  o.

Tsımbalük, AHİT Mahsus nezaret etici missiyasınıñ Qırımnı ziyaret etmege aqqı ve vekâletleri bar olğanını hatırlattı.