Qırımtatar Maaliy Merkezi

Siyasiy mabus Abdullayevniñ tacmaraz hastalığına oğrağanı tasdıqlandı - anası

26.11.2020

Kene ŞİZO-ğa keçirilgen Aqmescitteki ''Hizb ut-Tahrir davasınıñ” iştirakçisi, siyasiy mabus Abdullayevniñ COVİD-19 hastalığına oğrağanı tasdıqlandı. Bu aqta siyasiy mabusnıñ anası Dilâra Abdullayeva öz Facebook saifesinde haber etti.

''Tacmarazğa hastalanğan insan acele tıbbiy yardım almayıp, onda bu qorqunçlı hastalıqnıñ bütün alâmetleri bar olğanına baqmadan, adiy insaniy şaraitleri olmağan ŞİZO-ğa 10 künge keçirilip, köpek dayın ölümge maküm etile!'', - dep haber etile bildirüvde.

Anası, siyasiy mabusnıñ testi tasdıqlanğan soñ o, tıbbiy bölükke keçirilip, anda em kerekli tedavi, em yeterli miqdarda içeceklerniñ alıp olacağına ümüt ete.

Hatırlatamız ki, 2016 senesi oktâbrniñ 12-de Rusiye quvetçileri Aqmescit rayonındaki Mamaq köyünde kütleviy şekilde tintüvlerni keçirip, Uzeir Abdullayev, Teymur Abdullayev, Rustem İsmailov, Emil Cemadenov ve Ayder Saledinovnı yaqaladılar. Olarnı RF Ceza kodeksiniñ 205.5 maddesine dair ''teroristik faaliyetni teşkil etüv ve işbu faaliyette iştirak etüvde'' qabaatladılar.

2019 senesi iyunniñ 18-de Rusiyeniñ Şimaliy Kavkaz bölgesiniñ arbiy mahkemesi Aqmescitteki "Hizb ut-Tahrir davasınıñ" iştirakçilerine nisbeten üküm çıqardı. Teymur Abdullayev 17 yıl, Rustem İsmailov 14 yıl, Uzeir Abdullayev 13 yıl, Ayder Saledinov ve Emil Cemadenovnı 12 yıl apis cezasına mahküm ettiler.

2019 senesi dekabrniñ 24-de Moskvadaki Rusiye Yuqarı mahkemesi Aqmescitteki birinci "Hizb ut-Tahrir davası" iştirakçileriniñ ükmüni deñiştirip, olarnıñ apis cezalarını altı ayğa eksiltti.