Qırımtatar Maaliy Merkezi

2020 senesiniñ 9 ayı devamında işğal etilgen Qırımda 195 insan tevqif etildi - QMM

26.11.2020

2020 senesiniñ 9 ayı devamında işğal etilgen Qırımda 195 insan tevqif etildi, olardan 152 - tamır qırımtatar halqınıñ vekilleridir. 195 adiseden 48 yañı tevqif etüv ve çıqarılğan ükümler, 147 - qırımlı siyasiy mabuslarğa tevqif etüv müddetleriniñ uzatılmasıdır. Bu aqta 2020 senesiniñ 9 ayı devamında yüz bergen insan aqlarınıñ bozuluvları boyunca Qırımtatar Maaliy Merkezi tarafından azırlanğan esabatta haber etile.

Aq bozuluvlarnıñ işbu çeşitinde böyle deñişmeler qayd etilmekte: 2019 senesiniñ 9 ayı devamında 282 adise, 2018 senesi ise 138 adise qayd etildi.  Böyle deñişmelerge baqmadan, tevqit etüv müddetlerniñ uzatılması, yañi tevqif etüvler ve Qırım siyasiy mabuslarına uzun müddetli ükümlerniñ çıqarılması soñki yıllar devamında deñişmegen alda devam ete. Esap etilgen devirde 13 kişi 3,8 yıldan 19 yılğace azatlıqtan marum etildi, 35 kişi yaqalandı (soñra ise ya da azat etildi, ya da ev apisine alındı.

Hatırlatamız ki, 2020 senesiniñ 9 ayı devamında işğal etilgen Qırımda Rusiye quvetçileri eñ azından 40 tintüv keçirdi, olardan 25 - qırımtatarlarnıñ evlerinde yüz berdi, 68 kişi yaqalandı, olardan 28 - qırımtatarlardır, 70 sorğu, sorav ve ''sübet'' keçirildi, olardan 34 qırımtatar halqınıñ vekilleri ile bağlı edi.