Qırımtatar Maaliy Merkezi

QMM 2020 senesiniñ 9 ayı devamında işğal etilgen Qırımda 70 sorğu keçirilgenini qayd etti

26.11.2020

2020 senesiniñ 9 ayı devamında 70 sorğu, sorav ve ''sübet'' keçirildi, olardan 34 qırımtatar halqınıñ vekilleri ile bağlı edi. Keçken senelerniñ aynı devirleri ile qıyaslağanda, sorğularnıñ miqdarı azlaştı: 2019 senesiniñ 9 ayı devamında 169 adise, 2018 senesi ise 111 adise qayd etildi. Bu aqta 2020 senesiniñ 9 ayı devamında yüz bergen insan aqlarınıñ bozuluvları boyunca Qırımtatar Maaliy Merkezi tarafından azırlanğan esabatta haber etile.

RF-da yasaq etilgen ''Hizb ut-Tahrir'', ''Yehova şaatları'' teşkilâtlarında, Noman Çelebicihan adına batalyonda sözde iştirak etüv, cinayet aqqında haber etmeyüv, Ukraina faydasına casuslıq, halq ögünde teroristik/aşırıcı faaliyetke çağıruv, terroristik teşkilâtınıñ faaliyetinde iştirak etüvge azırlanuv, qanunsız şekilde patlayıcı malzemelerni satın aluv, saqlap tutuv ve taşuv ve ilâhre manaçıqlarnen yaqalanğan şahıslar sorğuğa çekilgen edi.

Işğal etilgen Qırım ile memuriy sıñırda da insanlar muntazam şekilde yaqalanıp sorğuğa çekile. Bundan ğayrı, esap etilgen devirde siyasiy mabuslarnıñ aqrabaları, din saasında faaliyet köstergen şahıslar, qırımtatar milliy areketiniñ faalcileri, regional meclislerniñ azaları ve başqa insanlar da sorğu/soravlarğa çekilgeni qayd etildi.

Hatırlatamız ki, 2020 senesiniñ 9 ayı devamında işğal etilgen Qırımda Rusiye quvetçileri eñ azından 40 tintüv keçirdi, olardan 25 - qırımtatarlarnıñ evlerinde yüz berdi, 68 kişi yaqalandı, olardan 28 - qırımtatarlardır.