Qırımtatar Maaliy Merkezi

2020 senesiniñ 9 ayı devamında Qırımda 68 kişi yaqalandı - QMM

25.11.2020

2020 senesiniñ 9 ayı devamında Qırımda 68 kişi yaqalandı, olardan 28 - qırımtatarlardır. 2018 ve 2019 seneleriniñ aynı devirleri ile qıyaslağanda, yaqalavlar eksildi: 2019 senesiniñ 9 ayı devamında 126 adise, 2018 senesi ise 91 adise qayd etildi. Bu aqta 2020 senesiniñ 9 ayı devamında yüz bergen insan aqlarınıñ bozuluvları boyunca Qırımtatar Maaliy Merkezi tarafından azırlanğan esabatta haber etile.

Ekseriy allarda yaqalanuvlar tintüvlerden soñ kerçekleşe, amma işğal etilgen Qırım ile memuriy sıñırda da insanlar muntazam şekilde yaqalana. Yaqalanuv RF-da yasaq etilgen ''Hizb ut-Tahrir'', ''Yehova şaatları'' teşkilâtlarında, Noman Çelebicihan adına batalyonda sözde iştirak etüv, cinayet aqqında haber etmeyüv, Ukraina faydasına casuslıq, halq ögünde teroristik/aşırıcı faaliyetke çağıruv, terroristik teşkilâtınıñ faaliyetinde iştirak etüvge azırlanuv, qanunsız şekilde patlayıcı malzemelerni satın aluv, saqlap tutuv ve taşuv ve ilâhre manaçıqlarnen yapıldı.

Hatırlatamız ki, 2020 senesiniñ 9 ayı devamında işğal etilgen Qırımda Rusiye quvetçileri eñ azından 40 tintüv keçirildi, olardan 25 - qırımtatarlarnıñ evlerinde yüz berdi. Bu köstergiç keçken seneniñ aynı devirine köre 2 kere azdır. Böyle deñişme, QMM ekspertleriniñ fikirince, tacmaraz salğını ile bağlıdır.