Qırımtatar Maaliy Merkezi

2020 senesiniñ 9 ayı devamında Rusiye quvetçileri Qırımda 40 tintüv keçirdiler - QMM

25.11.2020

2020 senesiniñ 9 ayı devamında Rusiye quvetçileri Qırımda eñ azından 40 tintüv keçirildi, olardan 25 - qırımtatarlarnıñ evlerinde yüz berdi. Bu köstergiç keçken seneniñ aynı devirine köre 2 kere azdır. Böyle deñişme, QMM ekspertleriniñ fikirince, tacmaraz salğını ile bağlıdır. Bu aqta 2020 senesiniñ 9 ayı devamında yüz bergen insan aqlarınıñ bozuluvları boyunca Qırımtatar Maaliy Merkezi tarafından azırlanğan esabatta haber etile.

Esap etilgen devirde tintüvlerniñ miqdarı eksilgenine baqmadan, RF-da yasaq etilgen ''Hizb ut-Tahrir'', ''Yehova şaatları'' teşkilâtlarında iştirak etüvde şeklengen insanlarnıñ evlerinde kütleviy şekilde tintüvlerniñ keçirilüvi devam etmekte. Bundan ğayrı, tintüvler sözde Noman Çelebicihan adına batalyonda iştirak etüv, Ukraina faydasına casuslıq, aşırıcılıq, dusmanlıqnı ya da nefretni qozğalav kibi manaçıqlarnen keçirile edi. Esap etilgen devirniñ yañı hususiyeti - çaquv yapılmağanı (''cinayet aqqında haber etilmegeni'') sebebinden tintüvleniñ keçirilüvi.

Tintüvler esnasında quvetçiler çoqusı allarda tintüvlerden zarar körgen insanlarnıñ aqlarını bozalar. Misal olaraq, ev-meskenlerge kirgende olar mülkiyetke zarar ketireler, ya da tintüvlerni saibi evinde olmadan keçirler, ya da yasaq etilgen kitaplarnı özleri ketirip taşlaylar.

Hatırlatamız ki, Qırım Rusiye Federatsiyası tarafından işğal etilgen soñ, yarımadada muntazam şekilde tintüvler keçirilmege başladı. Böyleliknen işğalciler Rusiyeniñ Qırımdaki areketlerine qol tutmağan insanlarnı qorqutmağa tırışa. QMM malümatlarına köre, 2019 senesi işğal etilgen Qırımda 86 tüntüv keçirildi, olardan 64 qırımtatalarnıñ evlerinde yüz berdi. Bu köstergiç 2018 senesi keçirilgen tintüvlerniñ miqdarına (92) yaqın, amma 2017 senesindekine (62) köre bayağı ziyadedir.