Qırımtatar Maaliy Merkezi

Siyasiy mabus Timur İbragimov uzun müddetten soñ ilk kere ömür arqadaşınen körüşti

18.11.2020

70 mahkeme oturışuvından soñ Bahçisaraydaki ''Hizb ut-Tahrir davasınıñ” iştirakçisi Timur İbragimov ömür arqadaşınen körüşe bildi. Siyasiy mabusnıñ sırtı ve qolu ağırmağa devam ete. Bu aqta Qırımtatar Maaliy Merkezine onıñ ömür arqadaşı Dilâra haber etti.

''Biz körüştik. 70 mahkeme ceryanından soñ birinci körüşüvimiz edi. Ruhsetniñ berilmesi defalarca sozğalandı, o, de muzakere etilmekte edi, de mahkemeciniñ imzasını bekley edi, de mabuslar 1-nci tevqifhaneden 5-ge avuştırılğan edi. 17 yıllıq apis müddetini ilân etken ükümden soñ birinci duyğularım... közyaşlar... körüşüv munasebetinen quvanç közyaşları, iç bir türlü qabaatı olmağan insan böyle müddetke apis etilgeni munasebetinen ise acı közyaşları'' , - dep paylaştı o.

Siyasiy mabusnıñ ömür arqadaşı apis şaraitleri bir qarar olğanını, yalıñız ücreniñ içi sers ve pek suvuq olğanı qayd etti.

''Sağlıq vaziyeti bir qarar, amma, yazıqlar olsun ki, sırtı ağırmağa devam ete, qolu tutula, 5-nci tevqivhanege köçken soñ, aşqazanı ağırmağa başladı, çünki eki künde bir olarğa domuz etini bereler... dinimiz ise onı aşamağa yasaq ete'', - dep qoştı Dilâra hanım.

Hatırlatamız ki, 2017 senesi oktâbrniñ 11-de Bahçisarayda işğalciler qırımtatarlarnıñ evlerinde kütleviy tintüvler keçirdiler. Tintüvlerden soñ Marlen Asanov, Server Zekiryayev, Memet Belâlov, Seyran Saliyev, Ernes Ametov ve Timur İbragimovnı yaqaladılar. Olarnı Rusiye CK-niñ 205.5 maddesine binaen (Rusiye Federatsiyasınıñ qanunlarına binaen terrorstik olaraq tanılğan teşkilâtnıñ faaliyetinde iştirak etüvde) qabaatladılar.

2018 senesi mayısnıñ 21-de işğal etilgen Qırımda Rusiye quvetçileri "Qırım birdemligi" birleşmesi faalleriniñ evlerinde tintüvler keçirip, Server Mustafayev ve Edem Smailovnı yaqaladılar. Olarnı da Rusiyede yasaq etilgen "Hizb ut-Tahrir" teşkilâtında iştirak etkenlerinde qabaatladılar.

2019 senesi fevral ayında Bahçisaraydaki ekinci "Hizb ut-Tahrir davasınıñ" 8 mabüsi -   Marlen Asanov, Server Zekiryayev, Memet Belâlov, Seyran Saliyev, Ernes Ametov, Timur İbragimov, Edem Smailov ve Server Mustafayevge qarşı Rusiye Ceza qanunnamesiniñ 278 maddesi boyunca (quvet yolınen akimiyetni elge keçirüv) cinaiy davanı açtılar.

Martnıñ 5-de Bahçisaraydaki ekinci "Hizb ut-Tahrir davasınıñ" eki mabüsi – Timur İbragimov ve Memet Belâlovğa qarşı qabaatlavlarnı Rusiye Ceza qanunnamesiniñ 205.5 maddesi ekinci qısmından ("terrorist teşkilâtında iştirak etmesi") birinci qısmına ("terrorist teşkilâtı faaliteniñ teşkil etmesi") deñiştirip quvetleştirdiler.

Berim ayınıñ 16-da Cenübiy okrugınıñ arbiy mahkemesi Bahçisaraydaki «Hizb ut-Tahrir» davasınıñ iştirakçilerine ükümler çıqardı. Suleyman Asanov qattı tertipli koloniyada 19 yılğa, Memet Belâlov 18 yılğa, Timur İbragimov 17 yılğa, Seyran Saliyev 16 yılğa, Server Mustafayev 14 yılğa, Server Zekeryayev 13 yılğa, Edem Smayilov 13 yılğa azatlıqtan marum etildi. Ernes Ametov qabaatsız tanılıp, mahkeme odasında azat etildi.