Qırımtatar Maaliy Merkezi

İşğal etilgen Qırımda daa 268 kişi tacmaraz hastalığına oğrağan

18.11.2020

Boş ay 18 kününiñ sabası itibarınen vaqtınca işğal etilgen Qırımda ve Aqyar şeerinde tacmaraz hastalığına daa 268 kişi oğrağan. Ağımdaki yılnıñ başından berli Qırımda 16369 kişiniñ bu hastalıqqa oğrağanı aqqında bellidir.

Qırım ''Sağlıq saqlav Nazirliginiñ'' ve Aqyar ''Ükümetiniñ'' İnternetteki saifelerinde haber etilgenine köre, işğal etilgen Qırımda 2756 kişi evde (covid) ve 2515 kişi hastahanelerde (kovid ile pnevmoniya) hastalıqlarından tedaviylene, 30 kişi observatorlarda buluna.

Aqyarda al-azırda hastahanelerde tadsıqlanğan COVİD-19 diagnozı ile 288 kişi buluna: infektsion hastahanede 148 kişi, 9 sanlı şeer hastahanesinde 137 kişi ve Mudafaa nazirliginiñ hastahanesinde 3 kişi tedaviylenmektedir.