Qırımtatar Maaliy Merkezi

Şağlıq vaziyeti yaramay olğanına baqmadan, siyasiy mabus Teymur Abdullayev ŞİZO-da tutula

18.11.2020

Sağlıq vaziyeti yaramay (sıcağı, öksürügi, zayıflığı) olğanına baqmadan, Aqmescitteki ''Hizb ut-Tahrir davasınıñ” iştirakçisi Teymur Abdullayev ŞİZO-da tutula. Oña tıbbiy yardım berilmey. Bu aqta siyasiy mabusnıñ anası Dilâra Abdullayeva öz Facebook saifesinde haber etti.

''Oğlum acele yardımğa muhtac! Oğlum Teymur Abdullayev pek hasta - virusqa oğradı. Böyle ciddiy ve telükeli hastalıqqa öğrağanına baqmadan o, SUS-ta tutula, onıñ sağlıq vaziyeti daa ziyade beterleşti. Bügün Ufa şeerinden kelgen abulqat oña kerekli ilâçlar ketirdi ve oğlum Teymur bügün ŞİZO-ğa avuştırılğanı aqqında belli oldı!'' -  dep yazdı o.

Siyasiy mabusnıñ anası mütenasip organlarğa muracaat etip, Teymur Abdullayevniñ fizikiy vaziyetini, tutuluv ve tedaviylev şaraitlerini teşkermege rica etti.

Hatırlatamız ki, 2016 senesi oktâbrniñ 12-de Rusiye quvetçileri Aqmescit rayonındaki Mamaq köyünde kütleviy şekilde tintüvlerni keçirip, Uzeir Abdullayev, Teymur Abdullayev, Rustem İsmailov, Emil Cemadenov ve Ayder Saledinovnı yaqaladılar. Olarnı RF Ceza kodeksiniñ 205.5 maddesine dair ''teroristik faaliyetni teşkil etüv ve işbu faaliyette iştirak etüvde'' qabaatladılar.

2019 senesi iyunniñ 18-de Rusiyeniñ Şimaliy Kavkaz bölgesiniñ arbiy mahkemesi Aqmescitteki "Hizb ut-Tahrir davasınıñ" iştirakçilerine nisbeten üküm çıqardı. Teymur Abdullayev 17 yıl, Rustem İsmailov 14 yıl, Uzeir Abdullayev 13 yıl, Ayder Saledinov ve Emil Cemadenovnı 12 yıl apis cezasına mahküm ettiler.

2019 senesi dekabrniñ 24-de Moskvadaki Rusiye Yuqarı mahkemesi Aqmescitteki birinci "Hizb ut-Tahrir davası" iştirakçileriniñ ükmüni deñiştirip, olarnıñ apis cezalarını altı ayğa eksiltti.