Qırımtatar Maaliy Merkezi

Aqmescitte yañı suv berüv cedveli qabul etildi

17.11.2020

Salı künü, boş aynıñ 17-den başlap, suv anbarlarındaki suvnıñ pek az olğanı sebebinden vaqtınca işğal etilgen Qırımdaki Aqmescit şeerinde yañı suv berüv cedveli amelge keçirilecektir. Bu aqta ''Voda Krıma'' şirketiniñ matbuat hızmeti haber etti.

"Suv anbarlarındaki suvnıñ miqdarı kritik seviyede olğanı sebebinden, suv ile temin etüvni tertipke ketirmek maqsadınen ''Voda Krıma'' şirketiniñ Aqmescitteki şübesi boş aynıñ 17-den başlap, yañı suv berüv cedvelini amelge keçirecektir: salı, çarşembe ve cumaaqşamı künleri - 06-00 - 08-00 ve 18-00 - 20-00 saatleri arasında, cuma, cumaertesi ve bazar künleri - 18-00 - 22-00 saatleri arasında suv berilecektir'', - dep haber etile bildirüvde.

Hatırlatamız ki, işğalciler Qırımda berilgen suvnıñ miqdarını yavaş-yavaş eki kere azlaştırğan ediler. Birinci basamaq: arman ayınıñ 23 ile 24 gecesi suvnıñ künlik miqdarı 140 biñ kub metregece eksildi. Sıcaq suv ile temin etüv toqtatıldı. Ekinci basamaq: arman ayınıñ 31-den berim ayınıñ 7-nece suvnıñ miqdarı künde 120 biñ kub metrege qadar eksildi. Suv cedvel boyunca berilmege başladı. Üçünci basamaq berim ayınıñ 7-de başlandı. Berilgen suvnıñ miqdarı 100 biñ kub metrege qadar eksilip, saatlernen saba ve aqşam berilmektedir.