Qırımtatar Maaliy Merkezi

Qırımtatarlar halq ögünde keçirecek diplomatiya Akademiyasınıñ iştirakçileri dünya tertibiniñ hususiyetleri ile tanış oldı

16.11.2020

Bazar künü, boş aynıñ 15-de, Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı ile Qırımtatarlar halq ögünde keçirecek diplomatiya IV Akademiyasınıñ 3-nci sessiyasını keçirdi. Keleçekte halq ögündeki diplomatlarğa global siyaset ve dünya tertibiniñ hususiyetleri ve insan aqlarını qorçalamağa yardım etken halqara vastalar boyunca lektsiya oquldı.

''Ukrain kelecegi institutı'' analitik merkeziniñ halqara siyaset boyunca eksperti İliya Kusa Akademiya iştirakçilerine körgezmeli vastalar yardımınen dünya tertibiniñ hususiyetlerini ve dünya sanasında olıp keçken esas ceryanlarnı numayış etip, tarif etti.

Ekspertniñ aytqanlarına köre, zemaneviy dünya tertibi Ekinci cian cenkinden soñ meydanğa keldi, amma Sovet Birligi dağılğan soñ teraze kelüvi biraz deñişti.

''Dünya tertibi altı elementke esaslana. Bular global mefküreler, global teşkilâtlar, halqara şartlar ve qaideler, küçler balansı, regional ittifaqlar ve emekniñ bölünüvidir'', - dep qayd etti Kusa ve er bir elementniñ hususiyetlerini tafsilâtlı şekilde tarif etti.

Qırımtatar Maaliy Merkezniñ eksperti, adliye ilimleri doktorı Borıs Babin insan aqlarını qorçalamağa yardım etken halqara vastalar ve halqara teşkilâtlarnıñ iştirakçi devletlerge (siyasiy-uquqiy ve imperativ) tesirleri aqqında ikâye etti. Qonuşmacı BM qararnamelerine, olarnıñ hususiyetlerine, yerine ketirilüvine ve imkânlarına faalcilerniñ diqqatını celp etti. Bundan ğayrı BM teşkilâtınıñ komitetleri ve İnsan aqları boyunca Avropa mahkemesi misallerinde Qırımda insan aqlarınıñ qorçalanması içün halqara vastalarnıñ işletilüvini talil etti.

Hatırlatamız ki, boş aynıñ 7-de Qırımtatar Maaliy Merkezi "Fridrih Naumann adına Azatlıq fondunıñ" Ukrainada vekilliginiñ qol tutuvı Qırımtatarlar halq ögünde keçirecek diplomatiya IV Akademiyasınıñ faaliyetini başladı. Oquv ceryanınıñ 6 sessiyası devamında ihtisaslı trenerlernen ekspertler diñleyicilerni dünya siyasetiniñ hususiyetleri ve yönelişleri, Qırımda insan aqlarınıñ bozuluvı, qorçalayıcı leyhalar, insan aqlarınıñ qorçalanmasına hızmet etken halqara vastalar, halqara leyhalarda körgezmeli tilniñ ve dizaynıñ rölü ile tanıştıracaqlar.

Qırımtatarlar halq ögünde keçirecek diplomatiya Akademiyası leyhası "Fridrih Naumann adına Azatlıq fondunıñ" Ukrainada ve Aqrusiyede vekilliginiñ qol tutuvı ile amelge keçirile.