Qırımtatar Maaliy Merkezi

Bariyev AHİT tedbirinde işğal etilgen Qırımda insan aqlarınıñ bozuluvı aqqında ikâye etti

13.11.2020

Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ azası Eskender Bariyev isan ölçevi boyunca AHİT qoşma muşaveresinde ''Din ya da inanç serbestligi: işbu aqnıñ er kes içün keliştirilmesinde dijital vastalarnıñ ve grajdan cemiyeti iştirakçileriniñ rölü'' mevzusında çıqışta bulundı. Bariyev işğal etilgen Qırımda insan aqlarınıñ bozuluvları aqqında ikâye etip, RF öz qanuniyetini qırımtatar halqınıñ zorbalıqsız küreşini boğmaq maqsadınen qanunsız şekilde qullanğanını qayd etti.

Bariyevniñ qayd etkenine köre, 2020 senesiniñ baarinden berli işğalci devlet karantin sebebinden yüz bergen vaiziyetni işğalci akimiyetke hızmet etken memurlarnıñ ve olarnıñ yardımcılarınıñ halqara teşkilâtlarnıñ planlaştırılğan tedbirlede iştirak etmeleri içün qullana.

''Sözde ''Qırım Cumhuriyeti Nazirler Şurası başlığınıñ muavini, Qırım Cumhuriyetiniñ Rusiye Federatsiyası Prezidenti yanındaki Daimiy Temsilcisi’’ Georgiy Muradovnıñ çıqışı munasebeti ile 2020 senesi ilk yaz ayınıñ 24-de Qırımtatar Maliye Merkezi halqara teşkilâtlarğa ''Onlayn şekilinde keçirilgen halqara tedbirlerde Rusiyeniñ Qırımdaki işğalci akimiyet vekilleriniñ iştirak etüvge yol bermemezlik aqqında'' mevzusında beyanat yapqan edi. İşğalci akimiyeniñ ''vekâletli memurı'' olğan Georgiy Muradov sañki "Russian Association for International Cooperation" cemaat teşkilâtınıñ adından ''Baqışlarnı ifade etüv, media ve haberler serbestligi'' mevzusında insan ölçevi boyunca AHİT II qoşma muşaveresinde çıqışta bulunğan edi'', - dep qayd etti o.

QMM başlığı 2020 senesi boş aynıñ 3-de Cenübiy okrugınıñ arbiy mahkemesi Qurmandaki ''Hizb ut-Tahrir davası” iştirakçilerine qanunsız uquq çıqarğanı aqqında hatırlattı. Bundan ğayrı, Qırım Rusiye Federatsiyası tarafından işğal etilgenden soñ yarımadada dijital vastalar yardımınen insanlarnıñ taqip etilgeni, farqlı fikirlernen ve diniy baqışlarnen küreş alıp barılğanı aqqında ikâye etti.

''Evlerde ve camilerde laqırdılar qanunsız şekilde yazıp alına, mahkeme oturışuvları esnasında sözde gizli şaatlarnıñ sesleri deñiştirile, Qırımdaki işğalci akimiyet insanlarnı foto ve video vastasınen qayd ete, soñra ise cezalay, FSB içtimaiy ağlarda 6-10 yıl evelsi yazılğan metinlerni ya da izaatlarnı insanlarnı qorqutmaq ya da taqip etmek içün qullana'', - dep añlattı o.