Qırımtatar Maaliy Merkezi

Faalci Ridvan Umerovğa qabaatlayıcı yekün berildi

13.11.2020

İşğal etilgen Qırımdaki ''prokuratura'' RF Ceza kodeksiniñ 205.6 maddesi (cinayet aqqında haber etmeyüv) boyunca faalci Ridvan Umerovğa qabaatlayıcı yekünini teslim etti. Bu aqta ''Qırım birdemligi'' haber ete.

'Tünevin müvekkilim Ridvan Umerov Qırım Cumhuriyeti prokuraturasına çağırıldı, anda oña cinaiy davası boyunca qabaatlayıcı yekün berildi. Davanıñ vesiqaları eñ yaqın vaqıtta mahkemede baqılması içün yollanılacaq. Qabaatlayıcı tarafnıñ delilleri gizli şaatlarnıñ sözlerine esaslana. Qırımda 205.5 maddesi boyunca davalarnıñ açılması saçmalıqtır'', - dep ikâye etti abulqat Marlen Halikov.

Hatırlatamız ki, arman ayınıñ 31-de Rusiye quvetçileri işğal etilgen Qırımnıñ İçki ve Seyitler rayonlarında, Sudaq şeerinde yaşağan qırımtatarlarnıñ evlerinde kütleviy tintüvler keçirdi. Neticede dört kişi yaqalandı. Olarnıñ episi Aqmescitteki FSB idaresine ketirildi. Soñra Qırımnı terk etmege yasaq etip, olarnı evlerine yiberdiler. Olarnıñ episi RF Ceza kodeksiniñ 205.6 maddesi (cinayet aqqında haber etmeyüv) boyunca qabaatlana.