Qırımtatar Maaliy Merkezi

Litva Qırım platformasında iştirak etmege niyetlendi - Litva elçisi

13.11.2020

Litva Cumhuriyetiniñ Ukrainada Elçisi Valdemars Sarapinas ''İnterfaks-Ukraina'' haber agentligine bergen intervyusında, Litva Ukrainanıñ halqara Qırım platformasını teşkil etmek qararına qol tutıp, onıñ faaliyetinde iştirak etmege niyetlengenini haber etti.

''Litva Ukrainanıñ halqara Qırım platformasını teşkil etmek qararına qol tutıp, onıñ faaliyetinde iştirak etmege niyetlendi. Kıyivniñ qararına qol tutamız, işbu teşebbüs tanımamazlıq siyasetini quvetleştirmege, Qırımnıñ arbiyleştirilüvine qarşılıq köstermege, insan aqları ve etraf müit saalarında vaziyetni nezaret etmege ve Qırımnıñ işğal etilmesi neticesinde peyda olğan başqa problemli meselelerni kötermege yardım etecektir'', - dep ayttı o.

Hatırlatamız ki, boş aynıñ 5-de Qırımtatar Maaliy Merkeziniñ temsilcileri Litva Cumhuriyetiniñ Ukrainada Elçisi Valdemars Sarapinas ile körüştiler. Körüşüv iştirakçileri vaqtınca işğal etilgen Qırımdaki vaziyetni muzakere ettiler, QMM faaliyetiniñ esas yönelişlerini taqdim etti, bundan ğayrı, taraflar bir sıra tedbirlerni beraberlikte keçirmege añlaştılar.