Qırımtatar Maaliy Merkezi

ABD Rusiye Federatsiyasını işğal etilgen Qırımda cezalavlarını toqtatmağa çağıra

13.11.2020

Cumaaqşamı künü, boş aynıñ 12-de, Amerika Birleşken Devletleriniñ AHİT-da Elçisi Ceyms Gilmor Rusiye Qırımda Rusiyeniñ ortodoks kilisesinden ğayrı bütün başqa diniy cemiyetlerni sıqıştırğanını qayd etti. O, Rusiye Federatsiyasını işğal etilgen Qırımda cezalavlarını toqtatmağa çağırdı.

Джеймс Гілмор Третій, посол США при Організації з безпеки і співпраці в Європі (ОБСЄ)

''Qırım uquq qorçalav gruppasınıñ malümatlarına köre, işğal başlanğandan berli diniy teşkilâtlarğa ve olarnıñ azalarına qarşı ''qanunsız missioner faaliyetinen oğraşqanları içün'' 101 memuriy dava açılğan eken. Soñki misallerden biri - Qırım musulman imami Ablâkim Galiyevniñ ekim ayınıñ 27-de Cuma namazını qıldırğanında qabaatlanması, böyleliknen işğalci akimiyetke hızmet etken diniy reberiyetke boysunmağa istemegen musulman liderleri cezalavlarğa oğratıla. Ekim aynıñ 14-de işğalci akimiyetke boysunmağan Urum katolik kilisesiniñ Rusiyedeki bölügine mahkeme ''qanunsız missioner faaliyetinen oğraşqanı içün'' cöreme kesti'', - dep ayttı o.

ABD Elçisi Rusiyeni işğal etilgen Qırımda cezalavlarını ve etnik ve diniy azınlıqlarınıñ taqip etilüvini toqtatmağa çağırdı.