Qırımtatar Maaliy Merkezi

İşğalciler Mustafa Cemilevniñ ''davası'' boyunca eki şaatnı sorğuladılar - Polozov

12.11.2020

Cumaaqşamı künü, boş aynıñ 12-de, Ermenibazar şeer ''mahkemesinde'' qırımtatar lideri Mustafa Cemilevniñ ''davası'' boyunca keçirilgen ''mahkeme oturışuvı'' esnasında qabaatlav tarafınıñ eki şaatı sorğulandı. Sorğulav esnasında şaatlardan biri Mustafa Cemilevni asla hatırlap olamadı. Bu aqta abulqat Mıkola Polozov öz Facebook saifesinde haber etti.

''Birinci olaraq şaat Savelyeva Olga Mıkolayivna sorğulandı. O, 2014 senesi Rusiye FSB sıñır hızmetinde ''Şeremetyevo'' halqara ava limanında nezaret noqtasında çalışqanını haber etti. Qoyulğan suallerge şaat cevap berip olamadı, çünkü o, bir qaç yıl evelsi pensiyağa çıqqan ve adiseni tafsilâtlı şekilde hatırlamay eken. Mustafa Cemilevni ve oña dair nasıldır areketlerniñ yapıp-yapmağanı aqqında iç bir şey hatırlap olamadı'', - dep haber etile bildirüvde.

Ekinci olaraq qabaatlav tarafınıñ şaatı Robertus İvan Volodımırovıç sorğulandı. O, 2014 senesi Rusiye FSB sıñır idaresinde tehnikacı vazifesinde çalışqanını ve Ermenibazardaki nezaret noqtasında hızmet etkenini haber etti. Şaatnıñ aytqanlarına köre, Mustafa Cemilev nezaret noqtasından Ermenibazar tarafına keçmege tırışmadı.