Qırımtatar Maaliy Merkezi

Siyasiy mabus Emil Ziyadinov sağlıq vaziyetine şikâyet ete

12.11.2020

Oraq ayınıñ 7-de kütleviy tintüvler neticesinde yaqalanğan soñki ''Hizb ut-Tahrir davasınıñ” iştirakçisi Emil Ziyadinov sağlıq vaziyetine şikâyet ete. O, mahkeme-psihiatrik teşkerüv esnasında pek hastalanğan: sıcağı köterilgen, qoqularnı ve aşlarnıñ damını is etmey, amma ekimler oña ''ölecek olsa bile'' yardım etmekten red etkenler. Bu aqta ''Qırım birdemligi'' haber ete.

''Emil al-azırda hasta. O, mahkeme-psihiatrik teşkerüvde olğanda pek hastalanğan. Sıcağı köterilgen, şu vaqıttan berli qoqularnı ve aşlarnıñ damını is etmey. Amma eñ başında teşkerüvden red etkeni sebebinden olar (ekimler) onı asla tedaviylemegenler. Amma qarardan ziyade öksürmege başlağan soñ, onınen beraber bir odada yatqan kişi ekimlerge oña bir şeyler bermege rica etken. Ekimler kelip, ölecek olsa bile, oña yardım etmeyceklerini aytqanlar'', - dep haber ete siyasiy mabusnıñ ömür arqadaşı Elviye.

Qadın tevqivhanege ilâclar yibergenini, amma aqayı angi ücrede oturğanını bilmegenini ayttı. Bu şebepten ilâclar bi afta devamında oña barıp yetmedi, oña bu ilâclarnı berip olamaylar.

Hatırlatamız ki, oraq ayınıñ 7-de quvetçiler Bahçisaray, Qurman ve Aqmescit rayonlarında qırımtatarlarnıñ evlerinde kütleviy tintüvler keçirdiler. Neticede yedi kişi yaqalandı. Olarnıñ episi Aqmescitteki FSB idaresine ketirildi. Oraq ayınıñ 7-de Aqmescitniñ Kıyiv rayon ''mahkemesi'' birinci derece saqatı Oleksandr Sizikovnı ev apisine aldı. Oraq ayınıñ 8-de işğal etilgen Qırımnıñ Kıyiv rayon “mahkemesi” İsmet İbragimov, Zekirya Muratov, Vadim Bektimirov, Emil Ziyadinov, Alim Sufyanov ve Seyran Hayredinovnı tevfiq etüv şekilinde sıñırlayıcı tedbirge üküm etti.