Qırımtatar Maaliy Merkezi

RF işğal etilgen Qırımda qanuniyetini suistimal etmege devam ete - Bariyev

11.11.2020

Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ azası Eskender Bariyev ''UA:Qırım'' telekanalında çıqışta bulunır eken, RF işğal etilgen Qırımda cezalavlarını devam etmek maqsadınen yarımamada öz qanuniyetini suistimal etmege devam etkenini qayd etti.

''Asılında vaziyet iç de eyileşmedi, işğalci mahkemeler daa yumşaq ükümler çıqarmağa başlamadı. Aksine. Mahkemeler mabuslarnı apis cezasına üküm eteler. Apis cezası ise daa qattı. İşğalci akimiyet vatandaşlarımıznı daa çoq FSB işkencehanelerinde tutmağa tırışqanını qayd ete bilemiz. Koloniyada mabuslarnıñ imkânları daa keniş, misal olaraq, olar tükânlardan bir şeyler satın ala bileler, apishanede ise tek ücre içinde oturmağa mümkün'', - dep añlattı Eskender Bariyev.

QMM başlığınıñ qayd etkenine köre, RF halqara uquqnı, IV Jeneva Beyannamesini bozmağa devam ete ve işğal etilgen topraqlarda öz qanuniyetini işletip, onı soñki 3 yıl devamında daa ziyade sertleştirdi. Bariyevniñ fikirince, RF işğal etilgen Qırımda cezalavlarını devam etmek, Rusiye pasportarını almağa razı olmağan Qırım sakinlerini mal-mülklerinden marum etip cezalamaq maqsadınen yarımamada öz qanuniyetini suistimal etmege devam ete. Bundan ğayrı, öz qanunları esasında RF ukranalılarnıñ aq-uquqlarını da bozmağa devam ete.

''Areketleri bir çoq halqara senetlerge zıt kelse de, Rusiye milliy qanuniyetiniñ halqara qanuniyetinden üstün köstermege tırışalar. Rusiye işğal etilgen topraqlarnı ellerinde tutmaq maqsadınen mahsus böyle siyaset alıp bara'', - dep qoştı o.