Qırımtatar Maaliy Merkezi

Siyasiy mabus Prıhodkonı şaraitleri yaramay olğan kamerağa avustırğanlar - dep haber ete onıñ qızı

01.10.2020

Ukraina tarafdarı qırımlı faalci Oleg Prıhodko oña evinden yollanılğan ilâclarınıñ berilüvini talap etkeni sebebinden şaraitleri yaramay olğan kamerağa avustırlğan. Bu aqta Qırımtatar Maaliy Merkezine Prıhodkonıñ qızı Nataliya haber etti.

Ekim ayınıñ 1-nde Prıhodkonıñ davası boyunca daa bir oturışuv olacaq edi, amma prokuror tatilde bulunğanı sebebinden o, başqa künge qaldırıldı. Rostov-na-Donu Cenübiy okrugınıñ arbiy mahkemesine siyasiy mabusnıñ ömür arqadaşı ve qızı kelgenler, olar Oleg Prıhodko ile biraz sübetleşip olğanlar.

''Ebet, biraz laf ettik. O, açuvlı, oña yollanğan ilâçlarnıñ berilmemesine şikâyet etkeni içün, onı 2x2 metralıq ve suçavullar ve furun böcekleri ile tolu kamerağa avuştırğanlar'', - dep haber etti qızı.

Nataliya bildirgenine köre, ilaçlarnı babasına bir ay devamında bermey ekenler ve çırayı pek yaramay olğan.

Hatırlatamız ki, 2019 senesi kiçik ay 8 künü Rusiye quvetçileri Ukraina tarafdarı faalci Oleg Prıhodkonıñ Saq rayonınıñ Orehovo köyündeki evinde tintüv keçirdiler.

2019 senesi ekim ayı 9 künü Rusiye quvetçileri Oleg Prıhodkonıñ evine bir kere daa ücüm etip, onı hırsızladılar. Nevbetteki kün evinde keçirilgen tintüvden soñ Prıhodko yaqalandı. Onınen beraber ömür arqadaşı Lübov yaqalanğan edi. Faalcini terror ücümini azırlağanında ve patlayıcı maddelerni qanunsız şekilde yapqanında qabaatladılar. Ömür arqadaşını başta şaat olaraq yaqaladılar, soñra ise azat ettiler. Ekim ayınıñ 10-da Kıyiv rayon ''mahkemesi'' Oleg Prıhodkonı ilk qış ayınıñ 10-ce apiste qaldırdı. Soñra qanunsız şekilde ondan DNK nümünesi alındı. Abulqatı Nazim Şeyhmambetovnıñ bildirgenine köre, bunı sahte deliller azırlamaq maqsadınen yaptılar. Siyasiy mabusnıñ apis müddeti defalarca uzatılğan edi. Çiçek ayınıñ 7-nde Prıhodko Rostov-na-Donu SİZO-sına ketirildi.