Qırımtatar Maaliy Merkezi

Ervin İbragimov qayda? Bugün qaçırılğan qırımtatar gençi 36 yaşını toldurdı

17.07.2021

Bütündünya qırımtatar kongressiniñ icra keñeşiniñ azası Ervin İbragimov qayda olğanı artıq 5 yıl devamında belgisiz qalmaqta. O, 2016 senesi 24 mayıs künü Bağçasarayda qaçırılğan edi. Bugün, 17 iyülde o, 36 yaşını toldurdı. Qırımtatar resurs merkeziniñ taqımı Ervinni doğğan kününen hayırlay. Eñ yaqın zamanda sağ-selãmet ana-babasınıñ yanına qaytacağına ümüt etemiz. Tuvğanlarına qaviy sağlıq, sabır ve küçlü irade tileymiz!

2016 senesi, 24 mayıs künü  Bağçasaray aylanma yolunda maşınası belgisiz adamlar tarafından toqtatıldı. Gençni zorbalıqnen mikroavtobusqa iteklep kirsettiler. O qaçmağa tırıştı, amma onı tutıp, maşınağa fırlattılar. Maşına Bağasaray suv anbarı tarafına ketti. Ervinniñ qaçırılmasını videokamera qayd etti.

RF Qırım Cumhuriyeti boyunca Tetqiq komitetiniñ tetqiq idaresi insan qaçırılması boyunca cezalı dava açtı, faqat Ervinniñ bulunğan yeri halã belgisiz qalmaqta.

 Keçken sene Aqmescitteki Kiyev rayon mahkemesi advokat Emil Kurbedinovnıñ tetqiq organlarına Ervinniñ qaçırılması boyunca şikãyetini red etti.

2016 senesi Gromadske jurnalstleri Ervin İbragimov qaçırılğan yerde Bağçasarayda bulunıp, ana-babası ve Meclis işdeşlerinen körüştiler.

 Ervin İbragimovnıñ qaçırılması haqqında Bağçasaraydan videoreportajda seyir etebilesiz.