Qırımtatar Maaliy Merkezi

Siyasiy mabüs Seytumer Seytumerovğa Rusiye Anayasasına deñişmeler kirsetüvi boyunca rey berüvde iştirak etmege teklif ettiler

29.06.2020

Bağçasaraydaki üçünci "Hizb ut-Tahrir davasınıñ" iştirakçisi Seytumer Seytumerovğa Aqmescitniñ ruhiy hastahanesinde Rusiye Anayasasına deñişmeler kirsetüvi boyunca rey berüvde iştirak etmege teklif ettiler. Siyasiy mabüs red etip, hastahane hızmetçilerini açuvlandırdı. Bu aqta "Qırım birdemligi" birleşmesi haber etti.

Siyasiy mabüsni ruhiy hastahanege alıp ketirgenler soñ Rusiye Anayasasına deñişmeler kirsetüvi boyunca rey berüv aqqında öz fikrini yazmağa rica ettiler.

"O, siyasiy mabüs, qırımtatarı ve Ukraina vatandaşı olam dep yazdı. İç bir rey berüvde, hususan Rusiye Anayasasına deñişmeler kirsetüvi boyunca rey berüvde iştirak etmege istemegenini yazdı. Onıñ arizası ruhiy hastahanesiniñ hızmetçilerini pek açuvlandırdı. Olar siyasiy mabüs olğanını bildirmeyip yañıdan arizanı yazmağa rica ettiler. Lâkin o, apiske alınğandan berli bütün arizalarda bunı yazğanını ve ileride de yazacağını qayd etip, kesen-kes red etti", - dedi advokat Edem Semedlâyev.

2020 senesi martnıñ 11-de Rusiye quvetçileri Bağçasaray şeeri ve Bağçasaray rayonında qırımtatarlarnıñ evlerinde tintüvler ötkerdiler. Tintüvler Seytumer Seytumerov, Osman Seytumerov, Şükri Seytumerov, Amet Suleymanov, Seydamet Mustafayev, Rustem Seytmemetov, ve Ayder Suleymanovnıñ evlerinde keçti. Bazı faallerni yaqaladılar. Martnıñ 12-de Aqmescitniñ Kiyev rayon "mahkemesi" Amet Suleymanovğa ev apisi cezasını berdi. Martnıñ 13-de "mahkeme" Bağçasaraydaki üçünci "Hizb ut-Tahrir davasınıñ" iştirakçileri Osman Seytumerov, Seytumer Seytumerov ve Rustem Seytmemetovnı apiske aldı.