Qırımtatar Maaliy Merkezi

Siyasiy mabüs Seytumer Seytumerov 32 yaşını toldurdı

28.06.2020

Bazar künü, iyunniñ 28-de, siyasiy mabüs, Bağçasaraydaki üçünci "Hizb ut-Tahrir davasınıñ" iştirakçisi Seytumer Seytumerov 32 yaşını toldurdı. O, öz doğğan kününi Rusiyeniñ Federal havfsızlıq hızmetiniñ apishanesinde qayd etmege mecbur. Anda onı ve "davanıñ" başqa iştirakçilerini Qırımnıñ işğalci akimiyeti qanunsız şekilde tuta. Qırımtatar Maaliy Merkezi can-yürekten Seytumer Seytumerovnı doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!

2020 senesi martnıñ 11-de Rusiye quvetçileri Bağçasaray şeeri ve Bağçasaray rayonında qırımtatarlarnıñ evlerinde tintüvler ötkerdiler. Tintüvler Seytumer Seytumerov, Osman Seytumerov, Şükri Seytumerov, Amet Suleymanov, Seydamet Mustafayev, Rustem Seytmemetov, ve Ayder Suleymanovnıñ evlerinde keçti. Bazı faallerni yaqaladılar. Martnıñ 12-de Aqmescitniñ Kiyev rayon "mahkemesi" Amet Suleymanovğa ev apisi cezasını berdi. Martnıñ 13-de "mahkeme" Bağçasaraydaki üçünci "Hizb ut-Tahrir davasınıñ" iştirakçileri Osman Seytumerov, Seytumer Seytumerov ve Rustem Seytmemetovnı apiske aldı.