Qırımtatar Maaliy Merkezi

Kiyevde Qırımtatar milliy bayraq kününi qayd ettiler (resimler)

27.06.2020

Cuma künü, iyunniñ 26-da, Kiyevniñ merkezinde Qırımtatar milliy bayraq kününiñ 10 yıllığına bağışlanğan tantanalı yürüş ötkerildi. Yüzlerce insanlar Ukraina paytahtınıñ merkeziy soqağı Hreşçatik boyunca 39 metrli bayraqnen keçtiler. Tedbir Mustaqillik Meydanında mitingnen yekünlendi. Mitingde Qırımtatar Milliy Meclisniñ azaları, faaller, din ve siyaset erbapları çıqışta bulundılar.

Qırımtatar milliy bayraq künü 2010 seneden berli er yıl qayd etile. Bugün qırımtatarlarnıñ milliy bayrağı tek yarımadanıñ tamır halqı içün degil de, bütün Ukraina içün Qırım oğrunda küreşniñ timsali oldı. Bu bayraq – qırımtatarlarnıñ boysunmağanı ve azatlıq ve öz aqları oğrunda küreşkeniniñ timsalidir. Qırımtatar milliy ve Ukraina devlet bayraqları ukrain yarımadasında serbest yelpireycek künü mıtlaqa kelir!