Qırımtatar Maaliy Merkezi

Siyasiy mabüs Ruslan Suleymanovnı ruhiy hastahanege yatqızdılar

25.06.2020

Aqmescitteki ekinci "Hizb ut-Tahrir davasınıñ" iştirakçisi Ruslan Suleymanovnı № 1 Qırım Cumhuriyet ruhiy hastahanesine mecburiy ruhiy teşkerüvge alıp ketirdiler. Bu aqta Qırımtatar Maaliy Merkezine mabüsniñ ömür arqadaşı Elzara haber etti.

"Aqayımnı hastahanege alıp ketkenlerini taqiqat tevqifhanesine yollanmalıqnı ketirgende bildim. Ruhiy hastahanede mabüslerni bir ay tutalar, aynı öyle bu "davanıñ" başqa iştirakçilerinen olğan edi. Advokat onı ziyaret etken soñ tafsilâtlı malümatnı elde etermiz", - dedi o.

2019 senesi martnıñ 27-de Rusiye quvetçileri işğal etilgen Qırımda qırımtatarlarnıñ evlerinde kütleviy tintüvler keçirdiler. Tintüvler 26 evde ötkerildi. Bazı faalerde yasaq etilgen kitaplarnı taptılar. "Qırım birdemiligi" birleşmesiniñ malümatına köre, şu kitaplarnı quvetçiler özleri ketirip qoydılar. Kitaplardan ğayrı insanlardan telefon, planşet, noutbuk ve pasportlarını tutıp aldılar. Quvetçiler qırımtatarlarğa nisbeten qaba şekilde areket ete ediler. Tintüvlerge kelgen advokatlarnı müşterilerine yibermey ediler. Tintüvler neticesinde 20 insan yaqalandı. Olarnı Rusiyede yasaq etilgen "Hizb ut-Tahrir" teşkilâtına alâqası olğanında qabaatladılar. Martnıñ 28-de tintüvler keçirilgen vaqıt evlerinde olmağan daa üç qırımtatar faalini yaqaladılar. Martnıñ 27-de ve 28-de işğal "mahkemesi" tintüvlerden soñ yaqalanğan bütün 23 insannı apiske aldı. Soñ olarnıñ apis müddetlerini defalarca uzattılar.