Qırımtatar Maaliy Merkezi

İşğal etilgen Qırımda daa bir qırımtatarnı yaqaladılar

11.06.2020

Cumaaqşamı künü, iyunniñ 11-de, işğal etilgen Qırımda Rusiyeniñ Federal havfsızlıq hızmeti Baydar köyüniñ sakini Ruslan Bekirovnı yaqaladı. Qırımtatarnı Rusiye Ceza qanunnamesiniñ 307 maddesine köre ("Bile-bile etilgen yalan şaatlıq, mütehassıs hulâsası ya da yañlış çevirme") qabaatlaylar. Bu aqta "Qırım birdemligi" birlişmesine advokat Rustem Kâmilev haber etti.

"O, maña telefon etip, oñı maşnağa oturtıp Lenina, 41 soqağına alıp ketkenlerini aytıp yetişti. Rusiyeniñ Ceza qanunnamesiniñ 307 maddesine köre qabaatlaylar", - dedi advokat.

Onıñ sözlerine köre, evelsi qırımtatarı Aqmescitteki aq qorçalayıcı ofiske uquqiy mesleat almaq içün barğan edi. Çünki 2019 senesi martnıñ 29-da Federal havfsızlıq hızmeti onı yaqalap, siyasiy mabüs Enver Seytosmanov cinaiy davasında işbirlikke celp etmege tırıştı.

Buña baqmadan Ruslan Bekirov mahkemede imaye tarafında iştirak etip, mahsus hızmetleri basqısı aqqında tarif etti. 2019 senesi aprelniñ 11-de o, Qara deñiz flotunıñ arbiy-taqiqat komitetine cinayet aqqında ariza yazdı.