Qırımtatar Maaliy Merkezi

Siyasiy mabüs Cemil Gafarovğa kerekli ilâclarnı bermeyler

11.06.2020

Aqmescitteki taqiqat tevqifhanesiniñ hadimleri Aqmescitteki ekinci "Hizb ut-Tahrir davasınıñ" iştirakçisi Cemil Gafarovğa ailesi ketirgen kerekli ilâclarnen yollanmalıqnı bermege red ettiler. Bu aqta Qırımtatar Maaliy Merkezine Gafarovnıñ ömür arqadaşı Raziye bildirdi.

"Tünevin ilâclar alğan hadim, bu ilâc degil dep "Polisorbnı" almağa red etti. Amma Cemil onı zeerlenüvni toqtatmaq içün içe. Ekimler onıñ 4 dereceli sürekli büyrek yetersizligi sebebinden daimiy zeerlenüvni toqtatmaq içün yaşayış boyunca "Polisorb" içmege tevsiye ettiler", - dedi o.

2019 senesi martnıñ 27-de Rusiye quvetçileri işğal etilgen Qırımda qırımtatarlarnıñ evlerinde kütleviy tintüvler keçirdiler. Tintüvler 26 evde ötkerildi. Bazı faalerde yasaq etilgen kitaplarnı taptılar. "Qırım birdemiligi" birleşmesiniñ malümatına köre, şu kitaplarnı quvetçiler özleri ketirip qoydılar. Kitaplardan ğayrı insanlardan telefon, planşet, noutbuk ve pasportlarını tutıp aldılar. Quvetçiler qırımtatarlarğa nisbeten qaba şekilde areket ete ediler. Tintüvlerge kelgen advokatlarnı müşterilerine yibermey ediler. Tintüvler neticesinde 20 insan yaqalandı. Olarnı Rusiyede yasaq etilgen "Hizb ut-Tahrir" teşkilâtına alâqası olğanında qabaatladılar. Martnıñ 28-de tintüvler keçirilgen vaqıt evlerinde olmağan daa üç qırımtatar faalini yaqaladılar. Martnıñ 27-de ve 28-de işğal "mahkemesi" tintüvlerden soñ yaqalanğan bütün 23 insannı apiske aldı. Soñ olarnıñ apis müddetlerini defalarca uzattılar.