Qırımtatar Maaliy Merkezi

Rusiye quvetçileri siyasiy mabüs Teymur Abdullayevni işbirlikke celp etmege tırıştılar

10.06.2020

"Hizb ut-Tahrir davasınıñ" iştirakçisi Teymur Abdullayev Başqırtistandaki apishanege ketirilgen soñ, oña Federal ceza icra etüv hızmeti ve "E" merkeziniñ hadimleri kelip, işbirlik yapmağa teklif ettiler. Lâkin siyasiy mabüs olarnen atta laqırdı etmege red etti. Bu aqta Qırımtatar Maaliy Merkezine onıñ ömür arqadaşı Alime haber etti.

"Aqayım apishanege ketirilgen soñ, oña Federal ceza icra etüv hızmeti ve Ekstremizmge qarşı çıquv merkeziniñ hadimleri keldiler. Olar oña baqışlarından vazgeçip, işbirlik yapmağa, şaatlıq etmege teklif ettiler. Elbette, aqayım olarnen atta laqırdı etmege red etti", - dedi o.

Qadınnıñ sözlerine köre, soñra siyasiy mabüske cezalav kamerasında tutıluvnıñ sebebi – işbirlikten red etüv, dep bildirdiler.

"Saña qarşı baskı ya da azaplarnı qullanalarmı?", - dep sorasam, "Cezalav kamerasında deşetli şaraitte tutıluv artıq basqı ola", - dep cevap berdi aqayım", - tarif etti Alime.

2016 senesi oktâbrniñ 12-de Rusiye quvetçileri Aqmescit rayonındaki Mamaq köyünde kütleviy şekilde tintüvlerni keçirip, Uzeir Abdullayev, Teymur Abdullayev, Rustem İsmailov, Emil Cemadenov ve Ayder Saledinovnı yaqaladılar. Olarnı Rusiyede yasaq etilgen "Hizb ut-Tahrir" teşkilâtında iştirak etüvde qabaatladılar.

2019 senesi iyunniñ 18-de Rusiyeniñ Şimaliy Kavkaz bölgesiniñ arbiy mahkemesi Aqmescitteki "Hizb ut-Tahrir davasınıñ" iştirakçilerine nisbeten üküm çıqardı. Teymur Abdullayev 17 yıl, Rustem İsmailov 14 yıl, Uzeir Abdullayev 13 yıl, Ayder Saledinov ve Emil Cemadenovnı 12 yıl apis cezasına mahküm ettiler.

2019 senesi dekabrniñ 24-de Moskvadaki Rusiye Yuqarı mahkemesi Aqmescitteki birinci "Hizb ut-Tahrir davası" iştirakçileriniñ ükmüni deñiştirip, olarnıñ apis cezalarını altı ayğa eksiltti.