Qırımtatar Maaliy Merkezi

Siyasiy mabüs Oleg Prihodko kene ailesinen körüşip olamadı

08.06.2020

İşğalciler Ukraina tarafdarı Oleg Prihodkonıñ ailesine qırğınlıq vaziyeti sebebinden mabüsnen körüşmege izin bermediler. Lâkin koronavirustan da evel olar daima faal qorantasınıñ körüşüv aqqında ricasını red ete ediler. Bu aqta Qırımtatar Maaliy Merkezine onıñ qızı Nataliya bildirdi.

"Babamnen körüşmege ruhset bermediler. Soñki kere anam onen daa Aqmescitte körüşken edi. Şimdi tek advokatlar vastasınen onen alâqadamız. Ricamıznı red etkenleriniñ sebebi sanki qırğınlıq. Lâkin ricalarımıznı evelsi de daima red ete ediler. Anama babamnen bir kere körüşüv bergenleri bir mücizedir", - dedi o.

2019 senesi fevralniñ 8-de Rusiye quvetçileri Saq rayonınıñ Örehovo köyünde yaşağan Ukraina tarafdarı Oleg Prihodkonıñ evinde tintüv keçirdiler.

Fevralniñ 9-da quvetçiler kene Prihodko evine kelip, onı alıp kettiler. Oktâbrniñ 10-da onıñ evinde kene tintüv keçirildi. Oleg ve onıñ apayı Lüdmila yaqalandılar. Faalni terrorizmde ve patlayıcı madde yapqanında qabaatladılar, onıñ apayını şaat olaraq tanıp, yiberdiler. Aqmescitniñ Kiyev rayon "mahkemesi" Oleg Prihodkonı dekabrniñ 10-ce apiske aldı. Soñ onda qanunsız şekilde DNA nümunelerini aldılar. Advokat Nazim Şeyhmambetovnıñ sözlerine köre, bu areketler dellilerni sahtelemek içün yapılğan edi. Siyasiy mabüske defalarca apis müddetini uzattılar. Aprel ayında faalni Rostov-na-Donu şeerindeki taqkiqat tevqifhanesine alıp kettiler.