Qırımtatar Maaliy Merkezi

Siyasiy mabüs Server Mustafayev halqara toplulıqnı Qırımnı azat etmegence kureşmege çağırttı

08.06.2020

Bağçasaraydaki ekinci "Hizb ut-Tahrir davasınıñ" iştirakçisi Server Mustafayev mahkeme oturışında halqara toplulıqnı Qırım işğalden azat etilmegence kureşni devam etmege çağırttı. Bu aqta "Qırım birdemligi" birleşmesi haber etti.

"Rusiye Cenübiy bölgesiniñ arbiy mahkemesiniñ evelki ve bugünki oturışlarında qanunsızlıq ve adaletsiz areketlerni körip bütün dünya aq qorçalayıcı ve siyasetçilerini daa ziyade faaleşmege çağırtam. Bu küreşniñ neticesi mıtlaqa olur. Bütün dunyanı niyetimizni yerine ketirmegence kureşni devam etmege çağırtam", - dedi o.

Bundan ğayrı Mustafayev, er siyasiy mabüs, er siyasiy mabüsniñ ailesi aqqında hatırlap, Qırımda yüzlerce ve biñlerce vatandaşımız apishanege oşağan alda yaşağanlarını unutmamağa çağırttı.

"Çeşit memleketlerde er afta, er ay Rusiye elçihanesi ögüne bizim adlarımız, resimlerimiznen çıqıp, bu qan qaynatqan tecavuz aqqında unutmağa bermeñiz", - dep kayd etti mabüs.

2018 senesi mayısnıñ 21-de işğal etilgen Qırımda Rusiye quvetçileri "Qırım birdemligi" birleşmesi faallerniñ evlerinde tintüvler keçirdiler. Neticede Server Mustafayev ve Edem Smailovnı yaqaladılar. Olarnı Rusiyede yasaq etilgen "Hizb ut-Tahrir" teşkilâtında iştirak etüvde qabaatladılar.

2018 senesi dekabrniñ 14-de Server Mustafayevnı ekspertiza keçirmek içün ruhiy hastahanege alıp kettiler. Mustafayev bu areketlerni "cezalav psihiatriyasi" dep adlandırdı.

2019 senesi fevral ayında Mustafayevni ekstremist mefküresiniñ ögrenüvi, tarqaluvı ve teşviqatında qabaatladılar.

2019 senesi sentâbrniñ 12-de Bağçasaraydaki ekinci "Hizb ut-Tahrir davasınıñ" iştirakçileri Marlen Asanov, Seyran Saliyev, Timur İbragimov, Memet Belâlov, Ernes Ametov, Server Zekiryayev, Server Mustafayev ve Edem Smailovnı Qırımdan Rostov-na-Donu şeerniñ apishanesine alıp kettiler.