Qırımtatar Maaliy Merkezi

Kuleba, Qırım işğalden azat etilmesi boyunca halqara platforma yaratuvı aqqında tarif etti

02.06.2020

Ukraina işbirlik yapqan memleketlernen "mıtlaqa olacaq Qırımnıñ işğalden azat etilmesi" boyunca halqara platformasınıñ yaratuvını muzakere etecek. Bu aqta salı künü, iyunniñ 2-de, Ukraina tış işler naziri Dmitriy Kuleba Almaniya tış işler naziri Heyko Maasnen körüşken soñ press-konferentsiyada bildirdi.

"İlk-evelâ bizni eki mesele raatsızlay. İnsan aqları meselesi ve Rusiye qanunsız şekilde tutqan insanlarnı azat etüv. Belli olğanı kibi, olarnıñ çoqusı – qırımtatarları. Ekincisi – global meseledir. Laf halqara ortaqlarımıznen Qırımdaki vaziyetni ve onıñ işğalden qaçınılmaz azat etilüvini nasıl formatta muzakere etilmesi aqqında kete", - dedi Dmitriy Kuleba.

O, yaqında şu meseleni Ukraina prezidenti Vladimir Zelenskiy tefsir etti, lâkin mesele Ukraina tış işler nazirligi içün da pek müimdir, dep qayd etti.

"Ortaqlarımıznen dialognı nasıl formatta qurmaq ve Qırım boyunca halqara platforma nasıl olacağını muzakere etecemiz. Şu mesele kelecekte de Heykonen muzakerelerimizniñ mevzusı olacaq", - dedi tış işler naziri.

Onıñ sözlerine köre, Qırım meselesi onıñ içün, tış işler naziri olaraq, esas meselelerden biridir.

İyunniñ 2-de Berlinde Ukraina ve Almaniya tış işler nazirleriniñ resmiy körüşüvi keçti. Körüşüvde Qırımnı işğalden azat etüv, NATOnen işbirlik ve Donbasstaki vaziyet muzakere etildiler.