Qırımtatar Maaliy Merkezi

Amerika Birleşken Devletleri Rusiyeden Qırımnı terk etmege talap ete

01.06.2020

Avropada Havfsızlıq ve İşbirlik Teşkilâtında ABD eyeti nevbetteki kere Rusiyeni Qırımnı terk etmege ve siyasiy ya da diniy baqışları içün apiste tutılğan Ukraina vatandaşlarını azat etmege çağırttı. Bu aqta eyetniñ saytında haber etile.

"Rusiyege oyundan çıqıp, Qırımnı Ukrainanıñ nezaretine qaytarmaq ve şarqiy Ukrainadan arbiylerni ve silânı çıqarmaq kerek. Tek o zaman Rusiye kene halqara toplulıqnıñ ürmetli azası ola bilecek", - dep qayd etti ABD elçisi Ceyms Gilmor.

Onıñ sözlerine köre, Qırımnen bağlı sıñırlavlar Rusiye yarımadanı Ukraina nezaretine qaytarıp, qanunsız şekilde apiste tutılğan bütün Ukraina vatandaşlarını azat etkenine qadar qullanılacaqlar.

"Biz Rusiyeniñ işğal etilgen Qırımda Moskva qırımtatarlar ve başqa Ukraina vatandaşlarınıñ yaşayışını yahşılaştırdı dep tasdıqlağanını red etemiz. 2014 senesi Qırımda "yeşil insançıqlar" peyda olğanından berli Rusiye qırımtatarlar ve diger Ukraina vatandaşlarınıñ aqlarını qaba tarzda bozğanı sebebinden yarımadanı on biñlerce insan terk etmege mecbur oldı", - denile beyanatta.