Qırımtatar Maaliy Merkezi

Siyasiy mabüs Ernes Ametov öz doğğan kününi taqiqat tevqifhanesinde qayd etmege mecbur

30.05.2020

Cumaertesi künü, mayısnıñ 30-da, siyasiy mabüs, Bağçasaraydaki ekinci "Hizb ut-Tahrir davasınıñ" iştirakçisi Ernes Ametov 35 yaşını toldurdı. O, öz doğğan kününi taqiqat tevqifhanesinde qayd etmege mecbur. Anda onı ve "davanıñ" başqa iştirakçilerini Qırımnıñ işğalci akimiyeti qanunsız şekilde tuta. Qırımtatar Maaliy Merkezi can-yürekten Ernes Ametovnı doğğan kününen hayırlay! Tezce apisten azat etilip, qorantanen qavuşmağa tileymiz! Allah baht, sabır ve sağlıq bersin!

2017 senesi oktâbrniñ 11-de Bağçasarayda işğalciler 6 qırımtatarı - Marlen Asanov, Seyran Saliyev, Timur İbragimov, Memet Belâlov, Ernes Ametov ve Server Zekiryayevnıñ evlerinde tintüvler keçirdiler. Tintüvlerden soñ qırımtatarlarnı yaqalap, Rusiye Ceza qanunnamesiniñ 205.5 maddesine köre "Rusiyede terroristik tanılğan teşkilâtında iştirak etüvde" qabaatladılar.

2018 senesi mayısnıñ 21-de işğal etilgen Qırımda Rusiye quvetçileri "Qırım birdemligi" birleşmesi faallerniñ evlerinde tintüvler keçirdiler. Neticede Server Mustafayev ve Edem Smailovnı yaqaladılar. Olarnı da Rusiyede yasaq etilgen "Hizb ut-Tahrir" teşkilâtında iştirak etüvde qabaatladılar.

2019 senesi fevral ayında Bağçasaraydaki ekinci "Hizb ut-Tahrir davasınıñ" iştirakçileri Marlen Asanov, Seyran Saliyev, Timur İbragimov, Memet Belâlov, Ernes Ametov, Server Zekiryayev, Server Mustafayev ve Edem Smailovğa qarşı Rusiye Ceza qanunnamesiniñ 278 maddesine köre (ükümni küçnen zapt etüv ya da ükümni küçnen tutuv) cinay dava açıldı.

Martnıñ 5-de Bağçasaraydaki ekinci "Hizb ut-Tahrir davasınıñ" iştirakçileri Timur İbragimov ve Memet Belâlovğa Rusiye Ceza qanunnamesiniñ 205.5 maddesiniñ ekinci qısmını ("terroristik teşkilâtında iştirak etüv") birinci qısmına ("terroristik teşkilâtınıñ faaliyetini teşkil etüv") deñiştirdiler.

2019 senesi sentâbrniñ 12-de Bağçasaraydaki ekinci "Hizb ut-Tahrir davasınıñ" iştirakçileri Marlen Asanov, Seyran Saliyev, Timur İbragimov, Memet Belâlov, Ernes Ametov, Server Zekiryayev, Server Mustafayev ve Edem Smailovnı Qırımdan Rostov-na-Donu şeerniñ apishanesine alıp kettiler.