Qırımtatar Maaliy Merkezi

Rusiye Tış işler nazirligi qırımtatar halqı soyqırımnıñ qurbanları hatırasına bağışlanğan halqara matem onlayn-mitingine qarşılıq kösterdi

29.05.2020

Rusiye Tış işler nazirligi, mayısnıñ 18-de Türkiye Cumhuriyetiniñ memurları ve qırımtatar diasporasınıñ temsilcileri ile ötkerilgen qırımtatar halqı soyqırımnıñ 76 yıllığına bağışlanğan halqara matem onlayn-mitingine qarşılıq kösterdi. Nazirlik öz beyanatında sanki facianıñ ahlâqsız şekilde qullanuvını qayd etip, mitingde Qırımğa nisbeten Stalin rejiminiñ basqısı şimdiki Rusiyeniñ siyasetinen qıyaslanğan içün öz raatsızlığını bildirdi.

Наталья Селиверстова/РИА «Новости»

Qırımtatar Maaliy Merkezi idaresiniñ yolbaşçısı, Qırımtatar Milliy Meclisniñ azası Eskender Bariyev cevap olaraq, Rusiye Tış işler nazirligi öz bildirüvni işğal etilgen Qırımda qırımtatar halqı soyqırımına bağışlanğan merasimler yasaq etilgen, qırımtatar milliy areketniñ fallerine kütleviy şekilde tenbiler ketirilgen ve qırımtatar halqınıñ faciasında qabaatlı olğan cinayetçi Stalinni qaramanlaştırıp, oña Qırımda abideler qoyulğan vaziyette yapqanını qayd etti.

"Qırım işğal etilgenden berli siziñ mahsus hızmetleriñiz kütleviy tintüvler, yaqalavlar ötkergen, 30 biñden ziyade qırımtatar Qırımnı terk etmege mecbur olğan ve 200 bala babasız qalğan vaziyette kim kerçekten Qırımğa nisbeten Rusiyeniñ şimdiki siyasetini Stalin rejiminiñ basqısına yaqınlaştıra?", - dep soradı Bariyev.

Mayısnıñ 18-de ilk kere qırımtatar halqı soyqırımnıñ qurbanları hatırasına bağışlanğan halqara matem onlayn-mitingi keçti. Miting bütün dünyağa yayınlandı. Merasimge qırımtatarlarnen birdemlikni kösterip, Kanada parlamenti, Litvaniya Seymi, Türkiye prezidenti, Ukraina Tış işler nazirliginiñ vekilleri, faaller, siyasetçiler, elçiler ve bütün dünya boyunca qırımtatar ve ukrain diasporalarınıñ temsilcileri qoşuldı.