Qırımtatar Maaliy Merkezi

NATO, Rusiye Qırımnı işğal etkenine nisbeten öz qatiy pozitsiyasını hatırlattı

27.05.2020

Bazarertesi künü, mayısnıñ 25-de NATO Parlament Assambleyasınıñ yolbaşçısı Attila Mesterhazi (Macaristan) Ukraina Yuqarı Şurasınıñ eyetinen video-körüşüvni keçiridi. Körüşüvde işğal etilgen Qırımdaki vaziyet muzakere etildi. Mesterhazi Rusiye Qırımnı işğal etkenine nisbeten Assambleyanıñ kesen-kes pozitsiyasını hatırlattı. Bu aqta Ukraina Yuqarı Şurasınıñ saytında haber etile.

"Rusiye, koronavirus qırğınlığı başlatqan buhrannı oña qarşı kirsetilgen sanktsiyalarnı lâğu etmek içün qullanmağa tırışa. Lâkin Rusiye akimiyetini Minsk añlaşmalarına köre Donbassta cenkni toqtatmağa ve Qırımnı azat etmege mecbur etmek içün sanktsiyalar ve siyasiy basqını müim vastaları olaraq qaldırmalımız", - dedi Ukraina eyetiniñ yolbaşçısı Yegor Çernev.

Attila Mesterhazi, NATO Parlament assambleyasi Ukrainanıñ mustaqilligi ve bütünligine qol tutıp, Rusiyeni Qırımnı işğal etkeni ve Ukraina şarqında cenk başlatqanı içün defalarca takbih etkenini qayd etti.