Qırımtatar Maaliy Merkezi

Siyasiy mabüslerniñ tayinlengen devlet advokatı koronavirusnen hastalandı

25.05.2020

Bazarertesi künü, mayısnıñ 25-de Rostov-na-Donu şeerniñ Cenübiy bölgesiniñ arbiy mahkemesinde "Hizb ut-Tahrir davası" boyunca oturışta mabüslerniñ tayinlengen devlet advokatı koronavirusnen hastalanğanı belli oldı. Bu vaziyet siyasiy mabüsler, şu cümleden 65 yaşında Lenur Halilovnıñ yaşayışı içün telükelidir. Bu aqta "Qırım birdemligi" birleşmesi haber etti.

"Oturışnı alıp barğan mahkemeci, tayinlengen devlet advokatlarından biri koronavirusnen hastalandı, dep haber etti. Bu vaziyet müşterilermizniñ sağılığı ve yaşayışı içün telükelidir. Olarnıñ arasında 65 yaşında Lenur Halilov havf altında buluna, lâkin mahkeme oturışında iştirak etti", - dedi advokat Ayder Azamatov.

2019 senesi iyunniñ 10-da ve 11-de Aqmescitniñ Kiyev rayon "mahkemesi" tintüvlerden soñ yaqalanğan Riza Omerov, Enver Omerov, Ayder Cepparov, Eskender Suleymanov, Ruslan Nagayev, Eldar Kantimirov, Ruslan Mensutov ve Lenur Halilovnı avgustnıñ 5-ce apiske aldı. Soñra olarnıñ apis müddeti defalarca uzatıldı. Oktâbrniñ 31-de Aqmescitniñ Kiyev rayon "mahkemesi" nevbetteki kere olarnıñ apis müddetini 2020 senesi fevralniñ 5-ce uzattı.

Qırımtatar Maaliy Merkezi dünya toplulığı, halqara aqqorçalayıcı teşkilâtlarnı siyasiy sebeplerden taqip etüvni toqtatmaq ve qanunsız mahkeme qararlarnı lâğu etmek içün Rusiye ve Qırımnıñ işğalci akimiyetine qarşı basqını quvetleştirmege çağırta.