Qırımtatar Maaliy Merkezi

4 yıl evel işğal etilgen Qırımda Ervin İbragimov hırsızlandı

24.05.2020

2016 senesi mayısnıñ 24-de işğal etilgen Bağçasarayda Dünya qırımtatar kongressi icra komitetiniñ azası Ervin İbragimov ğayıp oldı. Faalniñ babası emin ki, Ervinni Rusiye quvetçileri evelden azırlanıp, hırsızladılar. Dört yıl içinde işğalciler açqan cinaiy davada iç bir ilerilev yoq ve faal bulunğan yeri ale daa belli degil. Ümüt etemiz ki, Ervin tapılıp, öz evine, ana-babasına mıtlaqa qaytır!

Mayısnıñ 24-de, saat 22:20 Bağçasaraynıñ dolaşıq yolunda Ervin İbragimovnıñ maşnasını belli olmağan şahıslar (tahminen yol devriyesi hızmetçileri) toqtattılar. Olar Ervinni zorlap mikroavtobusqa mindirdiler. İbragimov qaçmağa tırıştı, amma onı tutıp Bağçasaray suv anbarı tarafına alıp kettiler. Bunıñ episini közetici kamera qayd etti.

Sözde Qırım boyunca Rusiyeniñ taqiqat komiteti Rusiye Ceza qanunnamesiniñ 126 maddesi ekinci qısmınıñ a, v punktlarına köre (adamnıñ hırsızlanuvı) cinaiy dava açtı, lâkin Ervin tutılğan yeri ale daa belli degil.

Bu yılnıñ mayıs ayında Aqmescitniñ Kiyev rayon "mahkemesi" advokat Emil Kurbedinovnıñ Ervin İbragimov davası boyunca taqiqatqa yollağan malümat talaplarınen bağlı şikâyetini red etti.

Faalniñ babası Umer İbragimov, onıñ oğlu Rusiye Qırımnı qanunsız zapt etkeni aqqında açıq-aydın aytıp, Rusiye tarafından basqığa oğrağan qırımtatarlarğa qol tuta edi, dep bildirdi. 2014 senesi Bağçasaray rayon memuriyetinde çalışqan Ervin İbragimov narazılıq kösterip, istifa etti. Bundan soñ o, defalarca Federal Havfsızlıq hızmetinden qorqutuvlar ala edi. Qorqutuvlar aqqında onıñ dostları ve tanışları bile ediler.

2016 senesi Hromadske.ua telekanalınıñ jurnalistleri Ervin İbragimov hırsızlanğan yerine bardılar ve onıñ ana-babası ve işdeşlerinen körüştiler.

Ervin İbragimov aqqında Qırımda çıqarılğan Hromadske.ua levhası